मुंबई, दि. 17 : अन्न, नागरी पुरवठा व ग्राहक संरक्षण विभागाच्या योजनांची अंमलबजावणी व कामकाजाचा सविस्तर आढावा विभागाचे मंत्री छगन भुजबळ यांनी आज घेतला.
मंत्रालयात झालेल्या या आढावा बैठकीस विभागाचे सचिव विजय वाघमारे यांच्यासह अन्य अधिकारी, संबंधित उपस्थित होते.
यावेळी मंत्री श्री.भुजबळ यांनी राज्यातील शिवभोजन केंद्राच्या सद्य:स्थितीबाबतचा आढावा घेऊन या केंद्रांच्या निधी वितरणाची माहिती घेतली. तसेच मराठवाडा व विदर्भातील 14 जिल्ह्यातील सर्व शेतकऱ्यांना अन्नधान्यऐवजी थेट रोख रक्कम हस्तांतरण योजनेंतर्गत करण्यात येत असलेल्या कार्यवाहीची सविस्तर माहिती घेतली. ‘आनंदाचा शिधा’ उपक्रमामध्ये राज्यभरात करण्यात आलेल्या शिधा वितरणाचाही आढावा घेतला. शासकीय धान्य गोदामातील अन्न धान्याच्या हाताळणुकीसाठी हमाल कंत्राट निश्चितीबाबत अन्न, नागरी पुरवठा विभागामार्फत राबवण्यात येत असलेल्या प्रक्रियेची माहिती घेतली. विभागाच्या अधिपत्याखालील (पुरवठा शाखा) गट ‘अ’ व ‘ब’ संवर्गातील पदांचे सेवाप्रवेश नियम सुधारित करणेबाबत केलेल्या कार्यवाहीची सविस्तर माहिती घेतली.
किमान आधारभूत किंमत खरेदी योजनेंतर्गत खरीप पणन हंगाम 2022-23 मधील धानाकरिता प्रोत्साहनपर राशी अंतर्गत नोंदणीकृत शेतकऱ्यांना देण्यात आलेल्या निधीची माहिती घेतली. त्याचप्रमाणे तृतीयपंथी नागरिकांना शिधापत्रिका वितरण, लक्ष्य निर्धारित सार्वजनिक वितरण व्यवस्थेंतर्गत पोषणतत्व गुणसंवर्धित तांदूळ (फोर्टीफाईड तांदूळ) वितरणाचा आढावाही मंत्री श्री. भुजबळ यांनी यावेळी घेतला.
ई-ऑफिसच्या माध्यमातून विभागाचे पूर्ण कामकाज केले जात असल्याचे सांगून जनतेला वितरण व्यवस्थेतील सर्व सोयीसुविधा सहजतेने उपलब्ध करुन देण्याच्या दृष्टीने विभागामार्फत महा रेशन तसेच महा निरीक्षक हे दोन नवीन ॲप सुरु करण्यात येणार आहेत, त्याबाबतची सविस्तर माहिती सचिव श्री.वाघमारे यांनी यावेळी दिली.
००००
वंदना थोरात/विसंअ/
