मुंबई, दि. 28 : माहिती व जनसंपर्क महासंचालनालय निर्मित ‘दिलखुलास‘ आणि ‘जय महाराष्ट्र‘ कार्यक्रमात ‘महालक्ष्मी सरस‘ या प्रदर्शनाबाबत महाराष्ट्र राज्य ग्रामीण जीवनोन्नती अभियानचे (उमेद) मुख्य कार्यकारी अधिकारी ऋचेश जयवंशी यांची मुलाखत प्रसारित होणार आहे.
राज्यातील दारिद्रयरेषेखालील कुटुंब तसेच महिला बचतगटांच्या माध्यमातून आर्थिक सक्षमीकरणासाठी ग्रामविकास विभागामार्फत विविध योजना व उपक्रम राबविण्यात येत आहेत. यामध्ये स्वर्णजयंती ग्राम स्वयंरोजगार योजना आणि महाराष्ट्र जीवनोन्नती अभियानांतर्गत स्वयंसहायता गटांच्या आणि सर्व रोजगाराच्या उत्पादनांची प्रसिद्धी व विक्री मोठ्या प्रमाणात व्हावी. यासाठी 8 जानेवारी 2024 पर्यंत ‘महालक्ष्मी सरस’ हे प्रदर्शन वांद्रे (पूर्व) येथे भरविण्यात आले आहे. या महालक्ष्मी सरस प्रदर्शनाचे स्वरूप, बचत गटांना यामध्ये सहभाग घेण्याची प्रक्रिया तसेच या प्रदर्शनाचे नियोजन याबाबतची सविस्तर माहिती ‘दिलखुलास‘ आणि ‘जय महाराष्ट्र‘ कार्यक्रमातून उमेद अभियानाचे मुख्य कार्यकारी अधिकारी श्री. जयवंशी यांनी दिली आहे.
‘दिलखुलास’ कार्यक्रमातून श्री. जयवंशी यांची मुलाखत शुक्रवार दि. 29 आणि शनिवार 30 डिसेंबर 2023 रोजी सकाळी 7.25 ते 7.40 या वेळेत आकाशवाणीच्या सर्व केंद्रांवरून व ‘न्यूज ऑन एआयआर‘ या मोबाईल ॲपवर प्रसारित होणार आहे. तर ‘जय महाराष्ट्र’ कार्यक्रमातून ही मुलाखत शनिवार दि. 30 डिसेंबर 2023 रोजी सायंकाळी 7.30 वाजता महासंचालनालयाच्या समाजमाध्यमांच्या पुढील लिंकवर ऐकता येणार आहे. निवेदिका सुषमा जाधव यांनी ही मुलाखत घेतली आहे.
महासंचालनालयाच्या समाजमाध्यमांच्या लिंक
एक्स – https://x.com/MahaDGIPR
फेसबुक – https://www.facebook.com/MahaDGIPR
यू ट्यूब – https://www.youtube.co/MAHARASHTRADGIPR
०००
