राज्यपालांच्या हस्ते जगातील दुसऱ्या मोठ्या आंतरराष्ट्रीय रत्न आभूषण प्रदर्शनाचे उद्घाटन
मुंबई, दि. 8 : रत्न व आभूषण उद्योगात भारताला संपन्न वारसा लाभला असून हा उद्योग प्राचीन असला तरीही त्यात नित्य नवीनता आहे. रत्न आभूषण उद्योजकांनी केवळ दागिने न घडवता एकमेव अद्वितीय कलाकृती निर्माण कराव्यात व या क्षेत्रात भारताचा आंतरराष्ट्रीय ब्रँड निर्माण करावा, असे आवाहन राज्यपाल सी.पी. राधाकृष्णन यांनी आज येथे केले.
मुंबईत सुरु झालेल्या पाच दिवसांच्या आंतरराष्ट्रीय रत्न व आभूषण प्रदर्शनाचे उद्घाटन राज्यपाल श्री.राधाकृष्णन यांच्या हस्ते आज जिओ वर्ल्ड कन्व्हेन्शन सेंटर, बांद्रा कुर्ला संकुल मुंबई येथे झाले, त्यावेळी ते बोलत होते. उद्घाटन सोहळ्याला कौशल्य उद्योजकता मंत्री मंगलप्रभात लोढा, रत्न व आभूषण निर्यात संवर्धन परिषदेचे अध्यक्ष विपुल शाह, उपाध्यक्ष किरीट भन्साळी, ब्रँड अम्बॅसेडर ‘मिस वर्ल्ड’ मानुषी छिल्लर, ‘डी बिअर्स’ हिरे व्यापार समूहाचे कार्यकारी उपाध्यक्ष पॉल राऊली, निमंत्रक निरव भन्साळी, जॉय अलुक्कास समूहाचे व्यवस्थापक पॉल अलुक्कास तसेच विविध देशांमधून आलेले निर्यातदार, प्रदर्शक व ग्राहक उपस्थित होते.
मुंबईत होणारे आंतरराष्ट्रीय रत्न व आभूषण प्रदर्शन हे हिरे, सोने, प्लॅटिनम आणि चांदीच्या दागिन्यांचे जगातील दुसरे भव्य प्रदर्शन म्हणून नावारूपास आले असून आगामी काळात ते जगातील पहिल्या क्रमांकाचे सर्वात मोठे प्रदर्शन होईल.
रत्न आभूषण उद्योगाने धनसंपदा निर्माण करावी, कारण धनसंपदेतूनच गरिबी निर्मूलनाचे कार्य होईल असे सांगून रत्न आभूषण उद्योजकांना काहीही अडचणी आल्यास आपण व्यक्तिशः संबंधित मंत्रालयाकडे पाठपुरावा करू, असे राज्यपाल श्री.राधाकृष्णन यांनी आश्वस्‍त केले.
केवळ दागिना घडविल्यास त्याचे मोल दोन – तीन लाख रुपये मिळेल, परंतु सुंदर एकमेव कलाकृती असलेला दागिना घडविल्यास तसेच त्याला ब्रँड म्हणून ओळख दिल्यास त्याच दागिन्याचे मोल पाच – दहा पटीने अधिक मिळेल, असे राज्यपालांनी सांगितले.
आज भारताने रत्न आभूषण उद्योगात अनेक स्वदेशी ब्रँड तयार केले आहेत. नवीनता, संशोधन व कलाकारांचे कौशल्य वर्धन यांवर भर देऊन उद्योजकांनी रत्न आभूषण क्षेत्रात भारताचा आंतरराष्ट्रीय ब्रँड निर्माण करावा, असे आवाहन राज्यपालांनी यावेळी केले.
राज्यातील 28 विद्यापीठांचा कुलपती या नात्याने आपण रत्न आभूषण निर्यात संवर्धन परिषदेला विद्यापीठांसोबत कार्य करण्याचे आवाहन करीत आहे असे सांगून परिषदेने विद्यार्थ्यांना रत्न आभूषण क्षेत्रात हितधारक बनवावे, असे राज्यपाल श्री.राधाकृष्णन यांनी सांगितले.
रत्न आभूषण उद्योजकांनी कौशल्य विकास कार्यास हातभार लावावा – मंगल प्रभात लोढा
देशातील रत्न आभूषण उद्योजक वार्षिक आंतरराष्ट्रीय रत्न आभूषण प्रदर्शनाला जगातील पहिल्या क्रमांकाचे प्रदर्शन बनवतील, असा विश्वास व्यक्त करून युवा पिढीला कौशल्य प्रशिक्षण देण्यास या क्षेत्रातील उद्योजकांनी हातभार लावावा, असे आवाहन कौशल्य विकास मंत्री मंगल प्रभात लोढा यांनी यावेळी केले.
शेजारील देशांमधील भयावह स्थिती पाहता उद्योजकांनी आपला पैसा समाजासाठी वापरावा. रत्न आभूषण क्षेत्रातील प्रत्येक उद्योजकाने किमान एका युवकाला तरी कौशल्ये प्रदान करावी, अशी सूचना त्यांनी यावेळी केली.
प्रदर्शनात जगातील ६० देशांमधून ५०,००० व्यापारी व विक्रेते, २१०० प्रदर्शक व ३६०० स्टॉल्स सहभागी होत असल्याची माहिती परिषदेचे अध्यक्ष विपुल शहा यांनी यावेळी दिली.
यावेळी राज्यपालांच्या हस्ते प्रदर्शनाच्या माहिती पत्रिकेचे उद्घाटन करण्यात आले.
Maharashtra Governor inaugurates world’s 2nd largest
Gem & Jewellery Show in Mumbai
Mumbai 8 : Maharashtra Governor C P Radhakrishnan inaugurated the 5 – day India International Jewellery Show (IIJS – 2024) Premiere organised by the Gem & Jewellery Export Promotion Council at the Jio World Convention Centre at BKC Mumbai on Thu (8 Aug).
The India International Jewellery Show is stated to be the 2nd largest Business to Business Jewellery Fair in the world. The Governor released the Pocket Guide to IIJS 2024 on the occasion.
Minister of Skills and Employment Mangal Prabhat Lodha, Chairman of Gem & Jewellery Export Promotion Council Vipul Shah, Vice Chairman Kirit Bhansali, Brand Ambassador of the event Manushi Chhillar, Executive Vice President of Diamond Trading ‘De Beers Group’ Paul Rowley, Convenor Nirav Bhansali, MD of Joyalukkas Group Paul Alukkas, Clients, Retailers, Exporters and Exhibitors from across the world were present.
According to the organizers, India International Jewellery Show has emerged as the 2nd largest Business to Business Jewellery Fair in the world, showcasing Diamond, Gold, Platinum, and Silver Jewellery along with loose Natural Diamonds, Gemstones, and Lab-grown diamonds.
More than 50,000 trade visitors and exporters from 60 countries are participating in the 5 – day Show.
