मुंबई, दि. 20 : शिराळा विभागातील पाझर तलावाचे साठवण तलावात रूपांतर करण्याबाबत आढावा घेण्यात आला. यावेळी शिराळा विभागातील कार्यरत असलेल्या प्रकल्पांचा विस्तृत आढावा घेऊन अधिक स्पष्टता यावी, यासाठी नवीन समिती गठित करावी, असे निर्देश मृद व जलसंधारण मंत्री संजय राठोड यांनी दिले.
मंत्रालयात आयोजित बैठकीस आमदार सत्यजित देशमुख, मृद व जलसंधारण विभागाचे मुख्य अभियंता तथा सहसचिव विजय देवराज तसेच कार्यकारी अभियंता तथा अवर सचिव प्रकाश पाटील व संबंधित वरिष्ठ अधिकारी उपस्थित होते.
मंत्री श्री. राठोड म्हणाले, शेतकऱ्यांना पाणीपुरवठा करणे हा आमचा मुख्य उद्देश असून, अधिक जलसाठा निर्माण करण्यासाठी तलावाचे क्षेत्र वाढवणे आवश्यक आहे. त्यासाठी तलावांची उंची व रुंदी या दोन्ही घटकांचा विचार केला पाहिजे. पाझर तलावात सुधारणा करताना त्याचा लाभक्षेत्र किती वाढला आहे, याची प्रत्यक्ष पाहणी करणे आवश्यक आहे. त्यामुळे पाझर तलावांशी संबंधित सर्व बाबींचा सखोल अभ्यास करण्यासाठी आणि सुरु असलेल्या सुधारित प्रकल्पांचा आढावा घेण्यासाठी एक नवीन समिती तयार करण्यात येईल, असेही त्यांनी सांगितले.
0000
