मुंबई दि. १३ : माहिती व जनसंपर्क महासंचालनालय निर्मित ‘जय महाराष्ट्र’ कार्यक्रमात ‘तंत्रशिक्षण अभ्यासक्रमाचे स्वरूप व प्रवेश प्रक्रिया’ या विषयासंदर्भात राज्य तंत्र शिक्षण संचालनालयाचे संचालक डॉ. विनोद मोहितकर यांच्या विशेष मुलाखतीचे प्रसारण होणार आहे.
राज्यातील दहावी आणि बारावीच्या विद्यार्थ्यांसाठी शैक्षणिक वर्ष 2025-2026 साठी राज्य तंत्र शिक्षण संचालनालयामार्फत तंत्रशिक्षण अभ्यासक्रमांसाठी प्रवेश प्रक्रिया सुरू झाली आहे. या प्रक्रियेमुळे राज्यातील तरुणांना व्यावसायिक आणि करिअर उभारणाऱ्या गुणवत्तापूर्ण तंत्रशिक्षणाची संधी उपलब्ध होणार आहे. यावर्षी प्रवेश प्रक्रियेत ई-कौन्सिलिंगची संकल्पना प्रथमच राबवण्यात आली आहे. यामुळे विद्यार्थ्यांना अधिक सुलभ, पारदर्शक आणि तांत्रिकदृष्ट्या सक्षम अशा पद्धतीने मार्गदर्शन आणि प्रवेशाची संधी मिळणार आहे.
संचालनालयामार्फत यावर्षी ‘सेंटर ऑफ एक्सलन्स’ ही संकल्पनाही प्रत्यक्षात आणण्यात आली आहे. या केंद्रांमध्ये अत्याधुनिक तंत्रज्ञान, आधुनिक प्रयोगशाळा आणि उद्योगानुसार सुसंगत कौशल्य प्रशिक्षण दिले जाणार आहे. त्याअनुषंगाने विद्यार्थ्यांनी या अभ्यासक्रमासाठी अर्ज कसा करायचा, पात्रता काय आहे, अभ्यासक्रमाचे स्वरूप कसे आहे आणि त्यामधून रोजगाराच्या संधी कशा खुल्या होतात या सर्व गोष्टींची सविस्तर माहिती संचालक डॉ. मोहितकर यांनी ‘जय महाराष्ट्र’ या कार्यक्रमातून दिली आहे.
‘जय महाराष्ट्र’ कार्यक्रमात ही मुलाखत मंगळवार दि. 17 जून 2025 रोजी दूरदर्शनच्या सह्याद्री वाहिनीवरून रात्री 8.00 वाजता प्रसारित होणार आहे. तसेच महासंचालनालयाच्या समाजमाध्यमांवर खाली दिलेल्या लिंकवरून ही मुलाखत पाहता येणार आहे. निवेदक डॉ. मृण्मयी भजक यांनी ही मुलाखत घेतली आहे.
एक्स- https://twitter.com/MahaDGIPR,
फेसबुक – https://www.facebook.com/MahaDGIPR,
यू ट्यूब – https://www.youtube.co/MAHARASHTRADGIPR
000
जयश्री कोल्हे/ससं/
