मुंबई, दि. ११ : मुंबई उपनगर जिल्ह्यात इतर मागास वर्ग प्रवर्गातील विद्यार्थ्यांकरिता १०० मुलींची क्षमता आणि १०० मुलांची क्षमता असलेले प्रत्येकी एक वसतिगृह सुरु करण्यात येणार आहे. मुंबई उपनगर जिल्ह्यात १० हजार चौरस फूट स्वतंत्र क्षेत्रफळाची जागा असलेल्या शासकीय वसतिगृहासाठी इमारत भाड्याने देऊ इच्छिणाऱ्या म्हाडा, सिडको, बृहन्मुंबई महानगरपालिका तसेच इमारत मालक, बांधकाम विकासक यांनी संपर्क साधावा, असे आवाहन समाज कल्याण विभागाचे सहायक आयुक्त मुंबई उपनगर यांनी केले आहे.
खासगी इमारत मुंबई उपनगर परिसरात असणे आवश्यक आहे. किमान क्षेत्रफळ १० हजार चौरस फूट असावे. या इमारतीमध्ये १० स्वच्छतागृह व १० स्नानगृहाची सुविधा असावी. इमारत अधिकृत असावी व पूर्णत्वाचा दाखला असावा.
इमारत भाडे कार्यकारी अभियंता, सार्वजनिक बांधकाम विभाग यांनी ठरवून दिलेल्या दरानुसार इमारत मालक देण्यास तयार असल्याबाबत संमतीपत्र देणे आवश्यक राहील.
प्रत्येक वसतिगृहाकरिता स्वतंत्र दोन इमारती आवश्यक असतील. म्हाडा, सिडको, बृहन्मुंबई महानगरपालिका तसेच इमारत मालक, बांधकाम विकासक यांनी सहायक आयुक्त, समाज कल्याण, मुंबई उपनगर, आर. सी. चेंबूरकर मार्ग, प्रशासकीय इमारत, ४ था मजला, चेंबूर (पू.), मुंबई–७१ या कार्यालयामध्ये लेखी स्वरूपात अर्ज करावेत. तसेच अधिक माहितीसाठी 02225222023 या दूरध्वनी क्रमांकावर संपर्क साधावा, असे आवाहन करण्यात आले आहे.
०००
शैलजा पाटील/विसंअ/
