ठाणे, दि.14(जिमाका):- प्रधानमंत्री जनजाती आदिवासी न्याय महाअभियानांतर्गत (PM JANMAN)सोमवार, दि.15 जानेवारी 2024 रोजी दुपारी 12.00 वाजता पंतप्रधान श्री. नरेंद्र मोदी देशातील आदिम जमातीच्या सर्वांगीण विकासासाठी देशातील आदिम जमातीच्या बांधवांशी थेट संवाद साधणार आहेत.
ठाणे विभागातील जि. प. शाळा, खरीड, ता. शहापूर जि. ठाणे येथे कार्यक्रमाचे आयोजन करण्यात आले आहे. या कार्यक्रमासाठी केंद्रीय वित्त व कार्पोरेट मंत्री ना.श्री.पियुष गोयल, केंद्रीय पंचायत राज राज्यमंत्री ना. श्री. कपिल पाटील, केंद्रीय वाणिज्य आणि उद्योग राज्यमंत्री ना. श्रीम. अनुप्रिया पटेल हे प्रमुख अतिथी म्हणून उपस्थित राहणार आहेत.
तसेच आजी-माजी आमदार, विविध विभागाचे शासकीय वरिष्ठ अधिकारी, पोलीस यंत्रणा आरोग्य पथके व आदिम जमाती (कातकरी) समाज बांधवही मोठ्या संख्येने उपस्थित राहणार आहेत.
या कार्यक्रमामध्ये आदिम (कातकरी) समाजाच्या लाभार्थ्यांना विविध दाखले, जातीचे प्रमाणपत्र, रेशनकार्ड, उज्वला गॅस योजनेचे साहित्य, तसेच घरकुल वाटपाचे आदेश, वैयक्तिक वनहक्क दावे मंजूरी आदेश, वैयक्तिकक बचतगटांना वनधन केंद्र मंजूरी आदेश, बहुउद्देशीय केंद्र (PMC) मंजूर आदेशांचे कातकरी लाभार्थ्याना वाटप करण्यात येणार आहे.
या कार्यक्रमाचे आयोजन जिल्हाधिकारी अशोक शिनगारे, आदिवासी विभागाचे अपर आयुक्त दीपककुमार मीना, जिल्हा परिषद मुख्य कार्यकारी अधिकारी मनुज जिंदल यांच्या प्रमुख मार्गदर्शनाखाली एकात्मिक आदिवासी विकास प्रकल्प, शहापूर जि. ठाणे चे प्रकल्प अधिकारी राजेंद्रकुमार हिवाळे यांनी केले आहे.
000
