शासकीय योजनांचा लाभ घेऊन अनेक जण आयुष्यात प्रगती साधत आहेत. कवठेमहांकाळ तालुक्यातील दुधेभावीचे कृष्णदेव गोसावी त्यापैकी एक. स्टार स्वरोजगार प्रशिक्षण संस्था म्हणजेच आर सेटी मधून व्यवसायाचे प्रशिक्षण व त्यानंतर मुद्रा योजनेतून स्वतःचा व्यवसाय त्यांनी सुरू केला आहे.
कृष्णदेव गोसावी यांचे कवठेमहांकाळ तालुक्यातील दुधेभावी हे गाव. आई, वडील, पत्नी व दोन मुले असे त्यांचे कुटुंब. कुटुंबाचा व्यवसाय शेती आहे. मात्र, त्यातून सहा जणांचे कुटुंबाचा उदरनिर्वाह करण्यात अडचण येत असल्याने त्यांनी बांधकाम क्षेत्रात बिलिंगची खाजगी नोकरी स्वीकारली. मात्र, आर्थिक अडचण दूर करण्यासाठी स्वतःचा व्यवसाय सुरू करावा, असा विचार त्यांच्या मनात आला. त्यातून कृष्णदेव गोसावी यांनी स्टार स्वरोजगार प्रशिक्षण संस्था सांगली या संस्थेतून सेल फोन दुरूस्ती आणि सेवा उद्यमी याचे मोफत प्रशिक्षण घेतले.
याबाबत कृष्णदेव गोसावी म्हणाले, आर सेटीच्या सेल फोन दुरूस्ती व सेवा उद्यमी या 30 दिवसांच्या प्रशिक्षणात आम्हाला सेल फोन दुरूस्ती व सेवा उद्यमीसाठी लागणारे आवश्यक सर्व प्रशिक्षण मिळाले. तसेच, व्यवसाय उभारणीसाठी कोणत्या मशिनरी वापराव्यात आदि बाबींची माहितीही मिळाली. आरसेटीचे प्रशिक्षक प्रदीप साळुंखे आणि प्रवीण पाटील यांनी बँकिंग, आर्थिक नियोजन कसे करावे, आलेल्या अडचणींवर मात कशी करायची, संभाषण कौशल्य आदिंची माहिती प्रशिक्षणात दिली. प्रशिक्षणादरम्यानच मला मुद्रा कर्जाविषयीही माहिती मिळाली.
यशस्वी प्रशिक्षणानंतर कृष्णदेव गोसावी व्यवसायासाठी कर्ज मिळवण्याच्या प्रयत्नात होते. त्यावेळी मुद्रा योजनेतून त्यांनी कर्जासाठी प्रस्ताव सादर केला. यासाठी त्यांना आर सेटी संस्थेचे संचालक महेश पाटील यांनी मदत केली. या योजनेतून कृष्णदेव गोसावी यांना एक लाख रूपये कर्ज मिळाले. त्यातून त्यांनी कोल्हापूर जिल्ह्यातील करवीर तालुक्यात बहिरेश्वर येथे स्वत:ची मोबाईल शॉपी सुरू केली. बहिरेश्वर येथे बांधकाम क्षेत्रात काम करत असताना पूर्वी काम केल्याने हा व्यवसाय स्थिरावू शकतो, हे त्यांनी ओळखले. त्याचा फायदाही त्यांना होत आहे. मासिक प्राप्ती चांगली होत असल्याने त्यांनी समाधान व्यक्त केले.
याबाबत कृष्णदेव गोसावी म्हणाले, व्यवसाय सुरू करण्यासाठी मला मुद्रा योजनेतून एक लाख रूपये कर्ज घेतले. त्यासाठी माझी स्वत:ची 80 हजार रूपये गुंतवणूक केली. अशी एकूण 1 लाख 80 हजार रूपये गुंतवणूक करून त्यांनी मोबाईल शॉपी सुरू केली. यातून सद्यस्थितीत 15 हजार रूपये मासिक उत्पन्न होत असून आर्थिक परिस्थिती सुधारली आहे. आरसेटी मध्ये जावून प्रशिक्षण घेऊन ग्रामीण भागातील तरूण पिढीने स्वतःच्या पायावर उभे रहावे, असा संदेश त्यांनी दिला.
– संप्रदा बीडकर
जिल्हा माहिती अधिकारी, सांगली
00000
