मुंबई, दि. 12 : मुंबईकरांसाठी विविध पायाभूत तसेच आरोग्य सुविधांची उभारणी करण्यात येत आहे. मुंबईच्या सुशोभीकरण, सौंदर्यीकरणासाठी राज्य शासन विविध उपक्रम राबवित असून गावदेवी परिसराच्या विकासासाठी निधी कमी पडू दिला जाणार नाही, अशी ग्वाही मुख्यमंत्री एकनाथ शिंदे यांनी दिली.
जोसेफ बाप्टिस्टा उद्यान, माझगाव येथे भंडारवाडा जलाशय क्रमांक ३ ची पुनर्बांधणी, त्यावर महापालिकेचे कार्यालय व प्रेक्षणीय अवलोकन सज्जा, परिसर सुशोभीकरण या विकासकामांचे भूमिपूजन मुख्यमंत्री श्री. शिंदे यांच्या हस्ते झाले. त्यावेळी ते बोलत होते. पर्यटन, महिला व बाल विकास, कौशल्य विकास मंत्री मंगलप्रभात लोढा, खासदार राहुल शेवाळे, स्थानिक आमदार यामिनी जाधव, यशवंत जाधव, माजी आमदार मधू चव्हाण,मुंबई महानगरपालिकेचे अतिरिक्त आयुक्त पी. वेलारासू यांच्यासह पदाधिकारी – अधिकारी यावेळी उपस्थित होते.
मुख्यमंत्री श्री. शिंदे म्हणाले की, नागरिकांच्या सदिच्छा राज्य शासनाच्या पाठीशी आहेत. सर्वसामान्य लोकांसाठीच हे सरकार आहे. राज्याचा विकास, सर्वसामान्यांना न्याय देण्याचं काम हे शासन करीत आहे. शेतकरी, कष्टकरी, कामगार, महिला अशा सर्वासाठी आम्ही काम करतोय. त्यामुळेच त्यांचे आशीर्वाद राज्य शासनाच्या पाठीशी आहेत. ते म्हणाले की, गावदेवी परिसरातून संपूर्ण मुंबई दिसते. यापुढे येथील विकास कामातून मुंबईचं विहंगम दृष्य दिसेल. दर्जेदार आणि गुणवत्तापूर्ण कामाचा आमचा आग्रह आहे.
गावदेवी मंदिर येथील उद्यान आणि परिसर विकासासाठी राज्य शासन पूर्ण सहकार्य करेल. गावदेवी येथील देवस्थानाला ‘ब’ वर्ग दर्जा देण्याबाबत कार्यवाही करण्यात येईल, असे मुख्यमंत्री श्री. शिंदे यांनी स्पष्ट केले.
गेल्या दहा महिन्यात अनेक प्रलंबित निर्णय राज्य शासनाने मार्गी लावले. मुंबई बदलत आहे. जी-२० परिषदेच्या निमित्ताने अनेक विकास कामे सुरू केली. पुढील दोन वर्षात खड्डेमुक्त मुंबई होणार आहे. मुंबईचा पैसा मुंबईकरांसाठी खर्च करणार असल्याचे त्यांनी यावेळी सांगितले. मेट्रो, सागरी किनारा रोड, ट्रान्स हार्बर लिंक रोड अशी अनेक विकास कामे सुरू आहेत. मेट्रो-२ मेट्रो-७ सुरू करतोय. मेट्रो-३ चा पहिला टप्पा लवकर पूर्ण होतोय, असे मुख्यमंत्री श्री. शिंदे यांनी यावेळी सांगितले.
ते म्हणाले की, सुशोभीकरण करत असताना मुंबईकरांच्या आरोग्याकडे लक्ष देतोय. ठिकठिकाणी बाळासाहेब ठाकरे आपला दवाखाना सुरू केले आहेत. शाळा, महाविद्यालयांच्या परिसरात असणाऱ्या अनधिकृत ड्रग व्यवसाय करणाऱ्यावर कारवाई करून ड्रग्ज फ्री मुंबई करण्याचे निर्देश दिल्याचे मुख्यमंत्री श्री. शिंदे यांनी सांगितले.
मंत्री श्री. लोढा म्हणाले की, मुख्यमंत्री श्री. शिंदे यांच्या नेतृत्वात महाराष्ट्र पुढे जात आहे. विविध विकासकामे मुंबई आणि राज्यात होत आहेत. सर्वसामान्यांच्या कामांना प्राधान्य देण्याचे काम राज्य शासन मुख्यमंत्री श्री. शिंदे आणि उपमुख्यमंत्री श्री. फडणवीस यांच्या मार्गदर्शनाखाली होत आहे.
अतिरिक्त आयुक्त पी. वेलारासू यांनी यावेळी मुंबई सौंदर्यीकरण कार्यक्रमाची माहिती दिली.
कार्यक्रमाच्या सुरुवातीला आमदार यामिनी जाधव आणि यशवंत जाधव यांनी देवीची मूर्ती भेट देऊन मुख्यमंत्री श्री. शिंदे यांचे स्वागत केले.
0000
दीपक चव्हाण/विसंअ/
