सांगली दि. 9 (जिमाका) :- संकेत सरगर यांने राष्ट्रकुल क्रीडा स्पर्धेत वेटलिफ्टिंग मध्ये रौप्य पदक पटकावून क्रीडा क्षेत्रात सांगली जिल्ह्याचा लौकिक वाढविला आहे. संकेत सरगर याला शासकीय नोकरी मिळावी यासाठी जिल्ह्याचा पालकमंत्री या नात्याने आपण पाठपुरावा करु, अशी ग्वाही पालकमंत्री डॉ. सुरेश खाडे यांनी आज दिली.
राष्ट्रकुल क्रीडा स्पर्धेत सर्वोत्तम कामगिरी करून रौप्य पदक पटकाविणाऱ्या संकेत महादेव सरगर यास जिल्हा परिषदेच्या वतीने 5 लाख रुपये पारितोषिक आणि प्रमाणपत्र वितरणाचा कार्यक्रम जिल्हा परिषदेच्या पद्मभूषण वसंतदादा पाटील सभागृहात संपन्न झाला. या पारितोषिकाचे वितरण संकेत सरगरचे आई-वडील यांना पालकमंत्री डॉ. सुरेश खाडे यांच्या हस्ते करण्यात आले. यावेळी मुख्य कार्यकारी अधिकारी जितेंद्र डूडी, उपमुख्य कार्यकारी अधिकारी राहुल गावडे यांच्यासह जिल्हा परिषदेचे खातेप्रमुख उपस्थित होते.
संकेत सरगरच्या क्रीडा क्षेत्रातील यशाच्या पाठीमागे आई-वडील राजश्री सरगर व महादेव सरगर यांचे योगदान मोलाचे आहे. संकेतला क्रीडा क्षेत्रात चांगले घडविल्याबद्दल व प्रोत्साहन दिल्याबद्दल पालकमंत्री डॉ. खाडे यांनी संकेतच्या आई-वडिलांचे अभिनंदन केले.
कृषी पांढरी म्हणूनओळख सांगली जिल्ह्याची असून आता जिल्हा क्रीडा पंढरी म्हणून ओळखला जाईल, अशा भावना संकेत सरगरचे वडील महादेव सरगर यांनी यावेळी व्यक्त केल्या. शिक्षणाधिकारी मोहन गायकवाड यांनी आभार मानले
000
