अकोला,दि. 5 (जिमाका) – जिल्ह्यातील सुपर स्पेशालिटी हॉस्पीटल, सामाजिक न्याय भवन, पोलिस वसाहत, पोलिस आयुक्तालय व सांस्कृतिक भवनाचे निर्माणाधीन बांधकामाची पालकमंत्री ओमप्रकाश उर्फ बच्चू कडू यांनी आज पाहणी केली. निर्माणाधीन इमारतीची कामे मुदतीच्या आत तातडीने पूर्ण करावित, असे निर्देश त्यांनी संबंधित यंत्रणांना दिले.
यावेळी विधान परिषदेचे आमदार रणजित पाटील, जिल्हाधिकारी जितेंद्र पापळकर, जिल्हा पोलिस अधीक्षक जी. श्रीधर, मनपाचे आयुक्त संजय कापडणीस, निवासी उपजिल्हाधिकारी संजय खडसे, शासकीय वैद्यकीय महाविद्यालयाचे डॉ. कुसुमाकर घोरपडे, जिल्हा शल्य चिकित्सक डॉ. राजकुमार चव्हाण, सार्वजनिक बांधकाम विभागाचे कार्यकारी अभियंता ए.ए.गणोरकर आदि अधिकारी उपस्थित होते.
सुपर स्पेशलिटी हॉस्पीटला भेट देऊन हॉस्पीटलचे बांधकाम व वैद्यकीय यंत्रसामुग्रीचे पाहणी केली. इमारतीची उर्वरित कामे तातडीने पूर्ण करा व उपचाराकरीता आवश्यक यंत्राची स्थापना करुन सामान्य नागरिकांना आधुनिक वैद्यकीय सुविधेचा लाभ लवकरात लवकर उपलब्ध करुन देण्याचे निर्देश श्री.कडू यांनी वैद्यकीय अधिकाऱ्यांना दिले. जिल्ह्यातील व बाहेरुन येणाऱ्या नागरिकांना उपाचाराकरीता सुपर स्पेशालिटी हॉस्पीटलचा मोठ्या प्रमाणात लाभ होणार असून दुर्धर व मोठे आजाराचे उपचार करणे सोईचे होणार आहे.
पोलिस वसाहत व पोलिस आयुक्तालयाच्या निर्माणाधीन बांधकामाची पाहणी करुन पोलिस कर्मचाऱ्यांना निवारा मिळणार असल्याचे समाधान व्यक्त केले. तसेच सामाजिक न्याय भवनाच्या कामाची पाहणी करुन विहित मुदतीच्या आत व दर्जेदार भवनाचे निर्माण कार्य पूर्ण करण्याचे निर्देश सार्वजनिक बांधकाम विभागाला दिले. जिल्ह्यातील सांस्कृतिक भवनाची उर्वरित कामे तातडीने पूर्ण करण्यासाठी आवश्यक तो निधी प्राधान्याने उपलब्ध करुन द्यावा, असेही निर्देश त्यांनी यावेळी दिले.
0000000
