नवी दिल्ली, दि. १९ : महाराष्ट्र परिचय केंद्राच्या वतीने आयोजित ‘महाराष्ट्र हीरक महोत्सव ऑनलाईन व्याख्यानमालेत’ २१ मार्च २०२१ रोजी पद्मश्री पुरस्कारप्राप्त खासदार तथा ज्येष्ठ संपाादक कुमार केतकर हे व्याख्यानमालेचे तिसरे पुष्प गुंफणार आहेत.
महाराष्ट्र राज्य निर्मितीला पूर्ण झालेले ६० वर्ष आणि महाराष्ट्र परिचय केंद्राच्या स्थापनेचे हीरक महोत्सवी वर्षानिमित्ताने परिचय केंद्राने ‘महाराष्ट्र हीरक महोत्सव व्याख्यानमालेचे’ आयोजन केले आहे. व्याख्यानमालेच्या तिसऱ्या दिवशी खासदार कुमार केतकर हे ‘महाराष्ट्राचा ‘मुंबई’ वारसा’ या विषयावर २१ मार्च २०२१ रोजी दुपारी १२ वाजता आपले विचार मांडणार आहेत.
महाराष्ट्राच्या स्थापनेपासून ते आतापर्यंत ६० वर्षांच्या कालावधीत सामाजिक, आर्थिक, राजकीय, शैक्षणिक, औद्योगिक, सांस्कृतिक, क्रीडा आदी क्षेत्रामध्ये केलेल्या प्रगतीचा व उल्लेखनीय कार्याचा आढावा घेण्याच्या उद्देशाने १९ मार्च २०२१ पासून ‘महाराष्ट्र हीरक महोत्सव व्याख्यान मालेचे’ आयोजन करण्यात आले आहे. ज्येष्ठ पत्रकार डॉ. विजय चोरमोरे यांच्या व्याख्यानाने व्याख्यानमालेची सुरुवात झाली आहे.
महाराष्ट्राचे सांस्कृतिक दूतावास म्हणून ओळख असणाऱ्या महाराष्ट्र परिचय केंद्राची देशाची राजधानी दिल्लीमध्ये १९६१ मध्ये स्थापना झाली. महाराष्ट्राचे पहिले मुख्यमंत्री यशवंतराव चव्हाण यांच्या दूरदृष्टीतून स्थापन झालेले हे कार्यालय केंद्र व राज्य शासनातील दुवा म्हणून महत्त्वपूर्ण भूमिका निभावत आहे. राज्याचे व परिचय केंद्राचे स्थापना वर्षे असे औचित्य साधून या व्याख्यानमालेचे आयोजन करण्यात आले आहे.
कुमार केतकर यांच्या विषयी
श्री. केतकर यांनी मुंबई विद्यापीठातून बीएची पदवी संपादन केली. पत्रकारिता व्यवसाय स्वीकारून त्यांनी कार्याला सुरुवात केली. दैनिक महाराष्ट्र टाईम्स आणि दैनिक लोकसत्ता या वृत्तपत्रांचे मुख्य संपादक म्हणून त्यांनी जबाबदारी सांभाळली आहे. केंद्र सरकारने २०१० मध्ये त्यांना पद्मश्री हा मानाचा नागरी पुरस्कार देवून सन्मानित केले. ‘ज्वालामुखीच्या तोंडावर’, ‘कथा स्वातंत्र्याची’, ‘विश्वामित्राचे जग’, ‘बदलते विश्व’, ‘त्रिकाल वेद’ आणि ‘ओसरलेले वादळ’ ही त्यांची प्रसिध्द पुस्तके आहेत.
श्री. केतकर यांनी अमेरिकेतील राष्ट्रध्यक्षाच्या ८ निवडणुकांचे वार्तांकन केले आहे. तसेच रशियाचे विभाजन, जर्मनीचे एकीकरण, हाँगकाँगचे एकीकरण या विषयांचे त्यांनी वार्तांकन केले आहे.
रविवारी समाज माध्यमांहून व्याख्यान प्रसारण होणार
रविवारी 21 मार्च 2021 रोजी दुपारी 12 वाजता परिचय केंद्राच्या अधिकृत ट्विटरहँडल , फेसबुक युट्यूब चॅनेलहून व्याख्यान थेट प्रसारित होईल. अधिकाधिक लोकांनी याचा लाभ घ्यावा, असे आवाहन करण्यात येत आहे. हे व्याख्यान परिचय केंद्राचे मराठी ट्विटर हँडल https://twitter.com/MahaGovtMic, हिंदी ट्विटर हँडल https://twitter.com/MahaMicHindi आणि इंग्रजी ट्विटर हँडल https://twitter.com/micnewdelhi वर लाईव्ह पाहता येणार आहे. तसेच कार्यालयाचे फेसबुक प्रोफाईल https://www.facebook.com/MICNEWDELHI , फेसबुक पेज https://www.facebook.com/micnewdelhiPR/ आणि फेसबुक मीडिया ग्रुप https://www.facebook.com/groups/525576297610799/?ref=share वर पाहता येणार आहे.
