मुंबई, दि. 9 : नेवासा तालुक्यातील धनगरवाडी आणि घोगरगाव या दोन ठिकाणी प्रत्येकी 33 के. व्ही. उपकेंद्र प्रस्तावाला मंजुरी देण्यात आली आहे. वीज प्रश्नासंदर्भात मृद व जलसंधारण मंत्री शंकरराव गडाख यांच्या अध्यक्षतेखाली आणि उर्जा राज्यमंत्री प्राजक्त तनपुरे यांच्या उपस्थितीत मंत्रालयात बैठक झाली.
धनगरवाडी येथे नवीन ३३/११ उपकेंद्र एसीएफमध्ये तरतूद करण्यात आली आहे. याकरिता ३४८.१८ लाख रुपये एवढ्या निधीची तरतूद केलेली आहे. घोगरगाव ता. श्रीरामपूर हे उपकेंद्र कृषी धोरण 2020 या योजनेमध्ये मंजूर करण्यात आले असून याकरिता ४३७.७८ लाख रूपये एवढ्या निधीची तरतूद करण्यात आली असल्याने या उपकेंद्रामुळे नागरिकांची वीजेची समस्या कायमची दूर होणार असल्याचे श्री गडाख यांनी सांगितले. काही दिवसांत उपकेंद्राच्या कामाला सुरुवात होणार असल्याचे उर्जा राज्यमंत्री प्राजक्त तनपुरे यांनी सांगितले.
नेवासा तालुक्यातील प्रत्येक गावातील उपलब्ध एसीएफच्या निधीतून उर्वरीत कामे पूर्ण करण्याचे निर्देश महावितरणच्या अधिकाऱ्यांना यावेळी देण्यात आले.
या बैठकीस महावितरणचे प्रकल्प संचालक श्री. भालचंद्र खंडाईत, अधीक्षक अभियंता (पायाभूत आराखडा) श्री. प्रवीण परदेशी, अधीक्षक अभियंता श्री. सुनील काकडे, नगर ग्रामीणचे कार्यकारी अभियंता श्री. लक्ष्मीकांत काकडे व संबंधित अधिकारी उपस्थित होते.
