मुंबई, दि ६ : शासनाने पूर्वी खुल्या बाजारातून उभारलेल्या  ८.६७ टक्के महाराष्ट्र राज्य विकास कर्जाची परतफेड देय असलेल्या व्याजासह ६ फेब्रुवारी रोजी सममूल्याने परतफेड करण्यात येणार असल्याची माहिती वित्त विभागाच्या सचिव (वित्तीय सुधारणा) शैला ए. यांनी दिली आहे.

महाराष्ट्र शासन, वित्त विभाग, अधिसूचना क्र. एलएनएफ-११.१२/प्र.क्र.१८/ अर्थोपाय दि. ०१ फेब्रुवारी, २०१३ अनुसार ८.६७% महाराष्ट्र राज्य विकास कर्ज, २०२३ अदत्त शिल्लक रकमेची दि. ०५ फेब्रुवारी २०२३ पर्यंत देय असलेल्या व्याजासह दि. ०६ फेब्रुवारी, २०२३ रोजी सममूल्याने परतफेड करण्यात येईल. परक्राम्य संलेख अधिनियम, १८८१ अन्वये महाराष्ट्र शासनाने उपरोक्त दिनांकास सुटी जाहीर केल्यास राज्यातील अधिदान कार्यालय, कर्जाची परतफेड अगोदरच्या कामाच्या दिवशी करेल. या कर्जावर दि. ०६ फेब्रुवारी, २०२३ पासून व त्यानंतर कोणतेही व्याज अदा करण्यात येणार नाही.   बँक खात्याच्या संबंधित तपशिलाच्या/इलेक्ट्रॉनिक माध्यमामार्फत निधी जमा करण्याच्या आदेशाच्या अभावी नियत दिनांकास परतफेड करणे सुलभ व्हावे यासाठी ८.६७% महाराष्ट्र राज्य विकास कर्ज, २०२३ च्या धारकांनी, लोक ऋण कार्यालयात २० दिवस अगोदर त्यांचे रोखे सादर करावेत.

दुय्यम सर्वसाधारण खातेवही लेखा किंवा रोखे प्रमाणपत्र यांच्या स्वरुपातील शासकीय रोख्यांच्या नोंदणीकृत धारकाकडील मुदत समाप्ती उत्पन्नाचे प्रदान हे, इलेक्ट्रॉनिक माध्यमामार्फत जमा निधीची सुविधा असलेल्या कोणत्याही बँकेतील धारकाच्या खात्यात जमा करून त्याच्या बँक खात्याचे संबंधित तपशिलांसह प्रदानादेशाद्वारे करण्यात येईल रोख्यांच्या बाबतीतील प्रदान करण्यासाठी, अशा रोख्यांचा मूळ वर्गणीदार किंवा यथास्थिती उत्तरवर्ती धारक, बँकेकडे किंवा कोषागाराकडे किंवा भारतीय स्टेट बँकेच्या शाखेच्या उप कोषागाराकडे किंवा यथास्थिती त्यांच्या दुय्यम बँकांकडे जर त्यांना व्याज प्रदान करण्यासाठी मुखांकित करण्यात आले असल्यास त्यांची नोंदणी करण्यात आली असल्यास त्याच्याकडे, त्यांच्या बँक खात्याचा संबंधित तपशील सादर करतील.

रोख्यांच्या मागील बाजूस ‘प्रमाणपत्रावरील देय मुद्दलाची रक्कम मिळाली.” असे नमूद करून भारतीय स्टेट बँकेच्या किंवा तिच्या कोणत्याही सहयोगी बँकाच्यामार्फत ज्या ठिकाणी कोषागाराचे काम केले जाते त्या ठिकाणी ते रोखे रोखा प्रमाणपत्राच्या स्वरुपात असल्यास, ते संबंधित बँकेच्या शाखेत सादर करावेत आणि ते कोषागार किंवा उपकोषागार येथे सादर करु नयेत.

रोख्यांची रक्कम प्रदान करण्यासाठी जी ठिकाणे मुखांकित करण्यात आली असतील त्या ठिकाणांखेरीज अन्य ठिकाणी ज्या रोखेधारकांना रक्कम स्वीकारायची असेल, त्या रोखेधारकांनी ते रोखे नोंदणीकृत व विमाबद्ध डाकेने संबंधित लोक ऋण कार्यालयात यथोचितरित्या पाठवावेत.  लोक ऋण कार्यालय  महाराष्ट्र राज्यात शासकीय कोषागाराचे काम करणा-या भारतीय स्टेट बँकेच्या किंवा तिच्या सहयोगी बँकेच्या कोणत्याही शाखेत कोषागारात/उपकोषागारात देय असलेल्या धनाकर्षाद्वारे त्याचे प्रदान करतील.

०००

श्रद्धा मेश्राम/ससं

मुंबई, दि. 6 : शैक्षणिक वर्ष २०२२-२३ करिता महाडीबीटी प्रणालीवरुन नवीन (Fresh) व नूतनीकरण (Renewal) च्या अर्जाची ऑनलाईन स्वीकृती दिनांक २२ सप्टेंबर, २०२२  पासून सुरु झालेली आहे.

मुंबई शहर आणि मुंबई उपनगर अधिनस्त सर्व महाविद्यालयांनी लवकरात लवकर नोंदणीकृत झालेले अर्ज ऑनलाईन मंजूर करावेत. दरवर्षी प्रमाणे नोंदणीकृत झालेल्या अर्जापैकी नूतनीकरण अर्जाचे प्रमाण नविन अर्जाच्या तुलनेत जास्त असते. त्यामुळे सर्व महाविद्यालयांनी आपले स्तरावरील नुतनीकरणाचे अर्ज प्रथम प्राधान्याने पडताळणी करुन ऑनलाईन मंजूर करुन संबधित सहायक आयुकत, समाज कल्याण, ( मुंबई शहर/उपनगर) यांचे लॉगीनकरिता तात्काळ पाठवावेत. तसेच महाविद्यालयांनी भारत सरकार मॅट्रीकोत्तर शिष्यवृत्ती तसेच शिक्षण शुल्क परीक्षा शुल्क प्रतीपूर्ती योजनेच्या लाभापासून अनुसूचित जाती प्रवर्गातील विद्यार्थी वंचित राहणार नाही, यांची दक्षता महाविद्यालयांच्या प्राचार्यांनी घ्यावी, असे आवाहन मुंबई उपनगर आणि मुंबई शहरचे समाजकल्याण विभागाचे सहायक आयुक्त प्रसाद खैरनार यांनी केले आहे.

000

नागपूर, दि.6- भारतात विविध शोध लावणाऱ्या प्रतिभावंत बालकांची कमी नाही. विज्ञान मेळाव्याच्या माध्यमातून त्यांच्या संशोधनाला योग्य दिशा देण्याची गरज आहे. या बाल विज्ञान काँग्रेस मधूनच उद्याचे अब्दुल कलाम निर्माण होतील, असा आशावाद भारतीय विज्ञान काँग्रेसच्या महासचिव डॅा.विजयलक्ष्मी सक्सेना यांनी व्यक्त केला.

बाल विज्ञान काँग्रेसचा आज समारोप झाला.  अध्यक्षस्थानी डॉ. विजयलक्ष्मी सक्सेना होत्या तर नेहरू विज्ञान केंद्राचे संचालक उमेश कुमार रस्तोगी, विज्ञान व तंत्रज्ञान विभागाचे जेष्ठ शास्त्रज्ञ डॉ. राज कुमार जोशी, बाल विज्ञान काँग्रेसच्या शैक्षणिक समितीचे अध्यक्ष डॉ. ललीतकुमार शर्मा, नागपूर विद्यापीठाचे आंतरशाखीय प्रमुख डॉ. प्रशांत कडू, भारतीय विज्ञान काँग्रेसचे सचिव डॅा.एस.रामकृष्णन, डॅा.अनुपकुमार जैन, डॅा.सुजित बॅनर्जी, संयोजक डॅा.निशिकांत राऊत याप्रसंगी उपस्थित होते.

डॉ. उमेशकुमार रस्तोगी म्हणाले की, विज्ञान प्रदर्शनात बालवैज्ञानिकांनी सादर केलेल्या संशोधन व कल्पना पाहुन आपल्या देशाचे भविष्य सुरक्षित आहे. ललीत शर्मा म्हणाले की, सामान्यांपेक्षा वेगळा विचार करून व जग बदलेल असे शोध लावा.

प्रशांत कडू यांनी प्रास्ताविकेतून बाल विज्ञान काँग्रेसच्या आयोजनाची माहिती दिली.

बाल विज्ञान काँग्रेसमध्ये देशभरातील 29 राज्यातील विद्यार्थी सहभागी झाले होते. या सर्वांना त्यांचे संशोधन दाखवण्याची आणि वैज्ञानिक समुदायातील त्यांच्या समवयस्कांशी संलग्न होण्याची संधी मिळाली, असे संयोजक डॉ. निशीकांत राऊत यांनी सांगितले संचालन योगेश्वरी भोंगाडे यांनी केले. कार्यक्रमाला बालवैज्ञानिक, विद्यार्थी उपस्थित होते.

000

नागपूर, दि. 6 : देशातील महिलांनी मेहनतीच्या बळावर विविध क्षेत्रातील सर्वोच्च पदे प्राप्त केले आहे. स्वबळावर विविध क्षेत्रात त्या नावलौकिक मिळवित आहे, सातत्याने पुढे जात आहे. त्यामुळे आता त्यांच्या कर्तृत्वावर चर्चा व्हावी, असे आवाहन कोलकाता येथील भारतीय प्राणीशास्त्र सर्वेक्षण संस्थेच्या संचालक डॉ.द्रिती बॅनर्जी यांनी केले.

भारतीय विज्ञान काँग्रेस निमित्त आयोजित महिला विज्ञान काँग्रेसच्या समारोपप्रसंगी त्या बोलत होत्या. नोबेल पुरस्कारप्राप्त शास्त्रज्ञ डॉ.अदा योनथ, डॉ.हॅगीथ योनथ, राष्ट्रीय फार्मास्युटिकल शिक्षण आणि संशोधन संस्थेच्या संचालक डॉ.शशी बाला सिंग, भारतीय विज्ञान काँग्रेसच्या अध्यक्ष डॉ.विजयलक्ष्मी सक्सेना, सचिव डॉ.एस.रामकृष्णन, महिला विज्ञान काँग्रेसच्या संयोजक डॉ.कल्पना पांडे आदी यावेळी उपस्थित होत्या.

भारतीय प्राणीशास्त्र सर्वेक्षण संस्थेच्या 105 वर्षाच्या इतिहासातील डॉ.द्रिती बॅनर्जी या पहिल्या महिला संचालक आहे. पुढे त्या म्हणाल्या, वैदीक काळात महिला सर्वच क्षेत्रात पुढे होत्या. समाजाला पुढे नेण्याची जबाबदारी त्यांच्यावर होती आणि त्या सक्षमपणे ही जबाबदारी पार पाडत होत्या. नंतरच्या काळात मात्र त्या चुल आणि कौटुंबिक जबाबदारीत बांधल्या गेल्या आणि समस्या निर्माण झाल्या. आता महिलांनी स्वबळावर पुन्हा विविध क्षेत्रात भरारी घेतली आहे. कोणतेही क्षेत्र शिल्लक राहिलेले नाही. त्यामुळे  आता त्यांच्या कर्तृत्वावर चर्चा झाली पाहिजे,असे डॉ.बॅनर्जी म्हणाल्या.

महिलांना मुक्तपणे विविध क्षेत्रात जाता आले पाहिजे. यासाठी तिच्यावर असलेल्या जबाबदारीचे विभाजन होणे आवश्यक आहे. महिला म्हणून ती करत असलेल्या काही कामांची जबाबदारी पुरुषांनी स्विकारावी. महिलांनी स्वत:वर विश्वास ठेवावा. प्रत्येक गोष्ट मी करु शकते हा आत्मविश्वास असला पाहिजे. आताची महिला सर्वच क्षेत्रात नेतृत्वाची भूमिका बजावत आहे, असे डॉ.बॅनर्जी यांनी सांगितले.               डॉ.शशी बाला सिंग म्हणाल्या, महिलांनी आव्हाने स्विकारली पाहिजेत. संसाधनांचा जास्तीत जास्त वापर कसा करता येईल याचा विचार करावा. महिलांना त्या स्वत:च पुढे नेऊ शकतात. त्यामुळे त्यांनी स्वत:शीच स्पर्धा करावी.

डॉ.विजयलक्ष्मी सक्सेना म्हणाल्या, महिला शास्त्रज्ञांना विविध समस्यांचा सामना करावा लागतो. भारतीय विज्ञान काँग्रेसच्या निमित्ताने त्यांना आपल्या नाविन्यपूर्ण कल्पना मांडण्याची व त्यावर मंथन करण्याची संधी मिळते. महिलांनी सर्वच क्षेत्रात पुढे गेले पाहिजे.               नोबेल पुरस्कारप्राप्त शास्त्रज्ञ डॉ.अदा योनथ यांनी, ‘विज्ञान तंत्रज्ञानाचे क्षेत्र हे पुरुषांसह महिलांसाठीही तितकेच खुले आहे. प्रत्येक क्षेत्रात त्यांना उत्तम काम करण्याची संधी आहे. खऱ्या अर्थाने जगभर महिला सक्षमीकरणाचे काम सुरु असल्याचे त्यांनी सांगितले. प्रास्ताविक संयोजक डॉ.कल्पना पांडे यांनी केले.

या आयोजनात देशातील विविध विद्यापिठे, महाविद्यालयातून आलेल्या महिला शास्त्रज्ञांनी आपल्या नाविन्यपुर्ण संकल्पना, यशोगाथा सादर केल्या. विज्ञान काँग्रेसच्या द्वितीय आणि अंतिम सत्रात देशभरातील महिला शास्त्रज्ञ, डॅाक्टर्स, प्राध्यापक, अधिव्याख्याता मोठ्या संख्येने उपस्थित होत्या. कार्यक्रमाचे संचलन व आभार डॉ.मंजु दुबे यांनी केले.

00000000

नागपूर,दि.6: वनस्पतींपासून वीज निर्मिती, नवजात बालकांच्या आरोग्य चाचण्यांचे महत्त्व, मातीतील किटांणूंमुळे निर्माण होणाऱ्या आजारांपासून बालकांचे संरक्षण, मासेमारी उत्पादनातील वाढ, हवामान शास्त्राचा स्मार्टग्रीडसाठी उपयोग, महाडेक दगडांचे संरक्षण आणि ऑनलाईन शिक्षणाचे महत्व विशद करणाऱ्या संशोधनांचे सादरीकरण करत आज भारतीय विज्ञान काँग्रेसमध्ये वैज्ञानिकांनी समाजाच्या शेवटच्या घटकांपर्यंत विज्ञान पोचवण्याचा निर्धार व्यक्त केला.  

      राष्ट्रसंत तुकडोजी महाराज नागपूर विज्ञापीठात सुरु असलेल्या 108 व्या भारतीय विज्ञान काँग्रेसमध्ये आज सायन्स कम्युनिकेटर काँग्रसचे आयोजन करण्यात आले. यात विविध सत्रांमध्ये संशोधनकार्याचे सादरीकरण झाले.

वनस्पतींपासून वीज निर्मितीच्या संशोधनामुळे देशातील ऊर्जास्त्रोतात भर पडेल

वनस्पतींपासून वीज निर्मितीचे नव संशोधन पटना येथील महिला महाविद्यालयाच्या डॉ.पिंकी प्रसाद यांनी सादर केले. वनस्पतींमधील कॅल्सियम,झिंक,कॉपर,आर्यन आणि मेटल या घटकद्रव्यांचा उपयोग करून वीज निर्मितीचे संशोधन कार्याबाबत त्यांनी माहिती सादर केली. उर्जा संकट टाळण्यासाठी आतापासूनच वनस्पतींपासून ऊर्जा निर्मिती करण्यासाठी सांघिक प्रयत्न व्हावे, असे त्यांनी स्पष्ट केले.

आरोग्य चाचण्यांनी नवजात बालकांच्या विकारांवर मात

भारतात थॅलेसेमिया, डाऊनसिंड्रोम आदी आजारानेग्रस्त बालके आणि त्याचा कौटुंबिक व सामाजिक जीवनावर होणारा परिणाम रोखण्यासाठी नवजात बालकांच्या जन्मापासून तीन दिवसांच्याआत महत्वाच्या पाच आरोग्य चाचण्या मोफत व्हाव्यात, असे मत पंजाब विद्यापीठाच्या डॉ राजींदर कौर यांनी मांडले. भारत देशात दररोज जन्माला येणाऱ्या बालकांपैकी 1500 नवजात बालकांमध्ये अनुवांशिक विकार आढळतात. या ठराविक बालकांचा विकास पूर्णपणे खुंटतो. अशा बालकांचे संगोपन हे पालकांपुढे मोठे आव्हान ठरते व एका सुदृढ समाजासाठीही मारक ठरते असे डॉ. राजींदरकौर म्हणाल्या. नवजात बालकांची चाचणी करून त्यांच्यातील व्यंगत्वदूर करण्यासाठी 1960 पासून जागतिक स्तरावर विविध कार्यक्रम सुरु असून भारतातही याबाबत पाऊले पडण्याची गरज असल्याचे त्यांनी मांडले. अनुवांशिक व्यंगत्वाचे निदान करणाऱ्या महत्वाच्या पाच आरोग्य चाचण्या सर्वांना नि:शुल्क उपलब्ध झाल्यास सुदृढ समाज निर्माण होईल, असे मत त्यांनी मांडले.

सुसंवादाने मत्स्य उत्पादनात वाढ

आसाम आणि बिहारमधील गोड्या पाण्यातील मासेमारी पद्धतीचा अभ्यास करून आणि प्रत्यक्ष 8 हजारांवर अधिक मच्छिमारांना प्रशिक्षण देणारे कोलकाता येथील केंद्रीय गोड्यापाण्यातील मासेमारी संशोधन संस्थेचे (आयसीएआर) गणेश चंद्र यांनी मत्स्य उत्पादनात सुसंवादाचे वैशिष्ट्यपूर्ण संशोधन मांडले. गेल्या तीन दशकात देशाच्या मत्स्य उत्पादनात 21 पटीने वाढ झाली आहे. मच्छिमार आणि मत्स्य उत्पादक यांना मिळणाऱ्या माहितीतील अडथळे आणि विसंवाद यामुळे या क्षेत्राचे नुकसान होत आहे. ब‍हुतांश मच्छिमार अशिक्षीत असल्याने मासेमारी क्षेत्रातील नवनवीन तंत्रज्ञानाची माहिती त्यांच्यापर्यंत पोहोचत नाही. योग्य माहितीच्या अभावामुळे सहकारक्षेत्राच्या फायद्यापासूनही हे मच्छिमार दुर्लक्षित राहतात. मच्छिमारांना वृत्तवाहिन्या, वृत्तपत्र,रेडियो आदी समाजमाध्यमांपासून मिळणारी माहिती ही स्थानिक माहितगारांपासून प्राप्त होणाऱ्या माहितीच्या तुलनेत कमी असल्याचे निरीक्षणही त्यांनी मांडले. गोड्या पाण्यातील मत्स्य उत्पादन वाढीसाठी आधुनिक संपर्क माध्यमांचा उपयोगासह सुसंवाद उपयुक्त ठरेल, असा विचार श्री चंद्र यांनी मांडला.

मातीजन्य किटाणुंपासून बालकांचे संरक्षणाचा विज्ञानाद्वारे आवाज

‘मातीतील किटाणुंमुळे बालकांना होणारे आजार व ते दुर्लक्षून ओढवणारे आरोग्याचे संकट’, यावर आधारित संशोधन मांडणाऱ्या लखनऊ येथील डॉ. बाबासाहेब आंबेडकर विद्यापीठाच्या डॉ सुमन मिश्रा यांनी दैनंदिन जीवनातील सामान्य विज्ञानच उपस्थितांसमोर आणले. मातीतील किटाणुंचा पोटात होणार प्रवेश  त्यामुळे बालकांमध्ये होणारी पोटदुखी याकडे पालकांकडून होणारे दुर्लक्ष आणि भविष्यात या आजाराचे दुष्परिणाम अशी श्रृंखलाच डॉ. मिश्रा यांनी मांडली. जागतिक आरोग्य संघटनेनेही पोटदुखीमुळे विद्यार्थ्यांची  शाळेत गळती होत असल्याचे निरीक्षण मांडल्याचे त्यांनी नमूद केले. भारतातही याच कारणामुळे मोठ्या प्रमाणावर विद्यार्थ्यांची गळती होत असल्याचे डॉ. मिश्रा यांनी सांगितले. विद्यार्थ्यांमध्ये तसेच पालकांमध्ये स्वच्छतेबाबत जनजागृती आणि प्रत्यक्ष अंमलबजावणी होण्याची गरज व्यक्त केली. सध्या लखनऊ जिल्ह्यातील 5 गावे आणि 6 शाळांमध्ये या दिशेने कार्य सुरु झाले असून त्याचे चांगले परिणाम दिसून येत असल्याचेही त्यांनी सांगितले.

याचप्रमाणे, सीएसआयआर दिल्लीच्या वैज्ञानिक डॉ. अवनी खाटकर यांनी हवामान शास्त्राआधारे देशातील उर्जाक्षेत्रात वापरात असलेल्या ग्रीडमध्ये सुधार होवून स्मार्टग्रीड तयार करण्याचे संशोधन मांडले. शिलाँग येथील इशान्य भारत विद्यापीठाच्या सहयोगी प्राध्यापक डॉ मेघाली यांनी इशान्य भारतातील महाडेक खडकांच्या संरक्षणाची गरज व्यक्त केली. हिमाचल प्रदेशातील हमीरपूर जिल्ह्याच्या नादौन येथील सिद्धार्थ महाविद्यालयाचे प्रा.सुनिल कुमार शर्मा यांनी येत्या काळात ऑनलाईन शिक्षणाची तंत्रस्नेही पद्धत मांडली.

अध्यक्षस्थानी राष्ट्रसंत तुकडोजी महाराज नागपूर विद्यापीठाच्या औषध निर्माण विभागाचे प्रमुख डॉ प्रशांत पुराणिक आणि प्रियदर्शनी जे.एम.औषध निर्माण महाविद्यालयाचे प्राचार्य डॉ दिनेश चाफले होते.

पहिल्या सत्रात जेनेक्स्ट जिमोनी संस्थेच्या डॉ.सुप्रिया काशिकर यांनी संस्थेद्वार करण्यात आलेल्या अँटीबॉडी संशोधनाची माहिती दिली. अन्य देशांच्या तुलनेत भौगोलिक परिस्थितीनुसार भारतात आढळणारी वैविद्यपूर्ण अँटीबॉडीज आणि त्याचा टॉप डाऊन व बॉटम पद्धतीने विभागणी करून झालेल्या अभ्यासाबाबत डॉ.काशिकर यांनी मांडणी केली. सावित्रीबाई फुले पुणे विद्यापीठाचे डॉ विकास खरात आणि गोरखपूर विद्यापीठाचे प्राध्यापक डॉ.सुधीर श्रीवास्तव हे अध्यक्षस्थानी होते.

00000

नागपूर, दि. 6 – तंत्रज्ञान महिला आणि मुलींसाठी गेम चेंजर ठरू शकते. विशेषत: दुर्गम आणि किरकोळ भागात तंत्रज्ञानामुळे महिला सक्षमीकरणात नक्कीच मदत होऊ शकते. त्यामुळे आम्हाला सिंड्रेला नको, तर महिला सबलीकरण आणि विकासासाठी ‘सायबेरेला’ हवी आहे, असे प्रतिपादन डॉ. शशी बाला सिंग, संचालक, नॅशनल इन्स्टिट्यूट ऑफ फार्मास्युटिकल एज्युकेशन अँड रिसर्च (NIPER), हैदराबाद यांनी केले.

राष्ट्रसंत तुकडोजी महाराज नागपूर विद्यापीठात आयोजित 108 व्या भारतीय विज्ञान काँग्रेसच्या चौथ्या दिवशी ‘ग्रामीण महिलांच्या सामाजिक-आर्थिक विकासासाठी तांत्रिक सक्षमीकरण’ या विषयावर चर्चासत्र पार पडले. या विषयावर सविस्तर माहिती देताना डॉ. शशी बाला म्हणाले की, भारत हा 140 कोटी लोकसंख्येचा देश असून त्यापैकी निम्म्या महिला आहेत. राष्ट्राच्या विकासासाठी या मानव संसाधनाचा वापर करणे आवश्यक आहे.

डॉ. वंदना बी. पत्रावळे, फार्मास्युटिकल सायन्सेस आणि टेक्नॉलॉजी इन्स्टिट्यूट ऑफ केमिकल टेक्नॉलॉजी, मुंबई, यांनी ‘पर्क्यूटेनियस कोरोनरी स्टेंट्स: फ्रॉम बेंच टू बेडसाइड’ या विषयावर मार्गदर्शन केले. संचालन डॉ.श्रद्धा जोशी यांनी केले.

0000000

नागपूर, दि. 6 – मृदा संवर्धन आणि प्रदूषण इ. अशा समस्यांवर मात करण्यासाठी नैसर्गिक संसाधनांचा ऱ्हास न करता सध्याच्या आणि वाढत्या जागतिक लोकसंख्येच्या गरजा पूर्ण करण्यासाठी व शाश्वत विकासासाठी विज्ञान आणि तंत्रज्ञानाचा अवलंब आवश्यक आहे, असे प्रतिपादन प्रा.अरविंद कुमार सक्सेना यांनी केले.

राष्ट्रसंत तुकडोजी महाराज नागपूर विद्यापीठात आयोजित 108 व्या भारतीय विज्ञान काँग्रेसच्या चौथ्या दिवशी ‘शाश्वत विकासासाठी विज्ञान आणि तंत्रज्ञान’ या चर्चासत्राचे आयोजन करण्यात आले. या सत्राचे अध्यक्षपदावरुन प्रा. अरविंदकुमार सक्सेना बोलत होते.

या सत्रात डॉ. ए.के. सिंग, नोएडा यांनीही मार्गदर्शन केले. ते म्हणाले की, भारत ही सर्वात वेगाने वाढणाऱ्या अर्थव्यवस्थांपैकी एक आहे. जैवतंत्रज्ञान हे आधुनिक, हरित आणि शाश्वत अर्थव्यवस्थेचे एक महत्त्वपूर्ण घटक आहे.  बायोइकॉनोमी चे स्वरूप हे कचरा व्यवस्थापन, शेती, ब्लू बायो-इकॉनॉमी, वन जैव अर्थव्यवस्था, ऊर्जा, कृत्रिम अवयव, पर्यावरण,आरोग्य आणि पोषण, जैव सुरक्षा, उच्च-कार्यक्षमता बायोमटेरियल, कापड इत्यादी क्षेत्रात दिसून येते. कोविड लसीचे यश हे भारतीय जैवतंत्रज्ञान क्षेत्राच्या ताकदीचे एक वैशिष्ट्यपूर्ण उदाहरण आहे. वाढत्या स्टार्ट-अप्सची संख्या, हे ऑपरेशन सुरू करणारे नवीन उद्योग एक पाऊल आहे, असेही डॉ. सिंग यांनी सांगितले.

000000