मुंबई, दि. 18 : आळंदी येथील यात्रेनिमित्त येणाऱ्या भाविकांना सर्व सुविधा उपलब्ध करुन देण्याचे निर्देश विधानपरिषद उपसभापती डॉ.नीलम गोऱ्हे यांनी संबंधित अधिकाऱ्यांना दिले.

आळंदीला येणाऱ्या भाविकांसाठी सर्व सोयी-सुविधांचे नियोजन करण्यासंदर्भात आज विधानभवनातील उपसभापती दालनात बैठक पार पडली त्यावेळी डॉ.गोऱ्हे बोलत होत्या. यावेळी पुणे जिल्हा परिषदेचे उदय जाधव, नगरविकास विभागाचे उपसचिव स.ज. मोघे, आळंदीचे मुख्याधिकारी समीर भूमकर, पिंपरी-चिंचवड महानगरपालिका जलनि:सारणचे कार्यकारी अभियंता विजयकुमार काळे आदी उपस्थित होते.

आळंदी येथे दरवर्षी यात्रेकरू मोठ्या संख्येने येतात. यावर्षीही यात्रेकरू येण्यास सुरुवात झाली आहे. त्यांना पाण्याचा तुटवडा पडू नये यासाठी संबंधित अधिकाऱ्यांनी काळजी घ्यावी व उद्यापासून त्यांनापाणी उपलब्ध करून द्यावे. यात्रेकरुंची पाण्याअभावी कुठलीही गैरसोय होऊ नये, यासाठी पाण्याचे नियोजन करणारी टीम तयार करून यात्रेकरूंना शुद्ध पाणी उपलब्ध करून द्यावे. तसेच नगरपालिका आणि जिल्हा परिषद यांनी समन्वयाने आवश्यक तितक्या टँकरने पाणी उपलब्ध करून देण्यात यावे,असे निर्देश यावेळी उपसभापती श्रीमती गोऱ्हे यांनी संबंधित अधिकाऱ्यांना दिले.

या बैठकीत अधिकची स्वच्छतागृहे,वाढीव पोलीस बंदोबस्त,सुरक्षिततेसाठी माहिती कक्ष,मदत कक्ष अधिक लोकाभिमुख करावे. यासाठी पत्रके तयार करुन प्रसिद्धी द्यावी,शौचालयांची व्यवस्था,कचरा व्यवस्थापन,मोफत औषधोपचार,खाद्य तपासणी,किटकांचा होणारा प्रादुर्भाव,वृक्षारोपण,पर्यटनदृष्ट्या आळंदी शहरातील प्राचीन मंदिरे तीर्थक्षेत्र विकास आराखड्याची पूर्ण झालेली कामे याबाबत यावेळी चर्चा करण्यात आली. तसेच मुलींच्या सुरक्षिततेच्या दृष्टीने शाळांची नोंदणी करणे,विश्रामगृहांचे बांधकाम,लोणीकंद मरकळ येथून वाहतूक सुरु करण्यासाठी ग्रामीण पोलीस अधीक्षकांशी चर्चा करुन नियोजन करण्यासंदर्भातही चर्चा करण्यात आली.

मुंबई,दि.18 :मराठा आरक्षणासंदर्भात उद्या सर्वोच्च न्यायालयात होणाऱ्या सुनावणीसाठी राज्य शासनाने माजी ॲटर्नी जनरल मुकुल रोहतगी यांच्या नेतृत्वाखाली विधिज्ञांची नेमणूक केली आहे. राज्य शासनाची बाजू खंबीरपणे मांडण्यासाठी सर्वतोपरी तयारी करण्यात आली आहे.

सर्वोच्च न्यायालयात मराठा आरक्षणाबाबत उद्या सुनावणी होणार आहे. यासाठी राज्य शासनाने नियुक्त केलेले माजी ॲटर्नी जनरल व ज्येष्ठ विधीज्ञ श्री. रोहतगी यांच्याबरोबरच ज्येष्ठ विधीज्ञ परमजितसिंग पटवालिया,अतिरिक्त सॉलिसिटर जनरल आत्माराम नाडकर्णी,राज्य शासनाने सर्वोच्च न्यायालयात नियुक्त केलेले विधीज्ञ निशांत कटणेश्वरकर,राज्यस्तरीय लेखा समितीचे अध्यक्ष ॲड. सचिन पटवर्धन,

मुंबई उच्च न्यायालयातील विधीज्ञ अॅड. सुखदरे,अॅड. अक्षय शिंदे,  सामान्य प्रशासन विभागाचे सचिव शिवाजी दौंड,विधी व न्याय विभागाचे सचिव (विधी विधान) श्री. राजेंद्र भागवत,सहसचिव श्री. गुरव हे सर्वजण सहाय्य करणार आहेत. शासनाने नियुक्त केलेल्या विधिज्ञांनी यासंदर्भात संपूर्ण तयारी केली असून प्रत्यक्ष हजर राहून आरक्षणासंदर्भात राज्य शासनाची बाजू भक्कमपणे मांडणार आहेत.

मुंबई, दि. 18 : कोरेगाव भीमा चौकशी आयोगाने साक्षीपुरावे नोंदविण्याचे काम चालू ठेवण्याचे ठरवले आहे. त्यानुसार साक्ष नोंदविण्याचे काम दि. 25 ते 28 नोव्हेंबर 2019 या कालावधीमध्ये आयोगाच्या मुंबई कार्यालयात होणार आहे आणि त्यानुसार सुरुवातीस ज्या साक्षीदारांची साक्ष घ्यायची आहे, त्यांना समन्स काढण्यात आले असल्याचे कोरेगाव भीमा चौकशी आयोगाचे सचिव यांनी प्रसिद्धीपत्रकाद्वारे कळविले आहे.

सुनावणीचा सविस्तर कार्यक्रम आयोगाच्या सूचनाफलकावर प्रसिद्ध झाला आहे. आयोगाच्या मुंबई आणि पुणे येथील कार्यालयात घेण्यात येणाऱ्या पुढील सुनावणीचा कार्यक्रम आयोगाच्या सूचना फलकावर प्रसिद्ध केला जाईल. ज्या साक्षीदारांना साक्षीसाठी बोलावण्यात आले आहे, त्यांची नावेसुद्धा माहिती आयोगाच्या कार्यालयात सूचना फलकांवर लावण्यात येणार आहेत.

दि. 1 जानेवारी 2018 रोजी कोरेगाव भीमा, जि.पुणे येथे घडलेली अनुचित घटना आणि त्यामुळे राज्यात कायदा आणि सुव्यवस्थेवर झालेला दुष्परिणाम विचारात घेऊन महाराष्ट्र शासनाने या घटनेची चौकशी, संदर्भ अटीनुसार करण्यासाठी चौकशी आयोगाची स्थापना केली.

दि. 11 मे 2018 आणि 15 जून 2018 रोजीच्या जाहीरनाम्याद्वारे शपथपत्राच्या स्वरुपात निवेदने मागवण्यात आली होती. त्यानंतर आयोगासमोर पुरावे नोंदवण्याचे काम सुरु आहे. दरम्यान आयोगाचा अहवाल सादर करण्यासाठीची मुदत वेळोवेळी वाढवून देण्यात येऊन वाढीव मुदत दि. 8 नोव्हेंबर 2019 रोजी संपली. गृह विभागानेPRO-0218/प्रका/70ब/विशा/2/दि. 8 नोव्हेंबर 2019 द्वारे आयोगास अहवाल सादर करण्याची मुदत दि. 8 फेब्रुवारी 2020 पर्यंत वाढवून दिली आहे.

इजिप्त बाय द गंगा महोत्सवाचे राज्यपालांच्या हस्ते उद्घाटन

मुंबई, दि. 18 : भारत आणि इजिप्त या प्राचीन संस्कृती आहेत. विविध महोत्सवांसारख्या सांस्कृतिक देवाणघेवाणीतून दोन्ही देशातील संबंध अधिक बळकट होतील, असे प्रतिपादन राज्यपाल भगत सिंह कोश्यारी यांनी आज येथे केले.

इजिप्त बाय द गंगा महोत्सवाच्या उद्घाटनाप्रसंगी ते बोलत होते. अरब रिपब्लिक ऑफ इजिप्तच्या भारतीय दूतावासामार्फत दोन दिवसीय महोत्सवाचे आयोजन मुंबई येथे करण्यात आले आहे. महोत्सवाच्या उद्घाटनाप्रसंगी इजिप्तच्या भारतातील राजदूत डॉ. हेबा बरासी, इजिप्तचे मुंबईतील कौन्सुलेट जनरल अहमद खलील,  भारतीय सांस्कृतिक संबंध परिषदेच्या प्रादेशिक प्रमुख रेणू प्रितियानी व अन्य मान्यवर उपस्थित होते.

यावेळी श्री.कोश्यारी म्हणाले की, अशा प्रकारच्या सांस्कृतिक देवाण घेवाणीसाठी भारतीय सांस्कृतिक संबंध परिषदेने सातत्याने प्रयत्न करावेत. अशा प्रकारच्या महोत्सवाचे आयोजन इजिप्तमध्ये देखील करुन तेथे भारतीय कलाकारांना व्यासपीठ उपलब्ध करुन द्यावे आणि भारतीय संस्कृती तिथपर्यंत पोहोचवावी, असे आवाहन त्यांनी केले.

प्रास्ताविकात श्रीमती बरासी यांनी या महोत्सवाच्या आयोजनामागची भूमिका स्पष्ट केली. मुंबई येथील नॅशनल सेंटर फॉर परफॉर्मिंग आर्ट आयोजित या महोत्सवात द कैरो ऑपेरा हाऊस बॅलेटमार्फत इजिप्तच्या पारंपरिक नृत्य प्रकारांचे सादरीकरण करण्यात आले. तसेच इजिप्त येथील हस्तकला वस्तूंचे प्रदर्शन, चित्रप्रदर्शन अशा विविध कार्यक्रमांचे आयोजन करण्यात आले होते.

मुंबई, दि. 17 : बृहन्मुंबई पोलिसांच्या स्वरतरंग 2019 या कार्यक्रमास राज्यपाल भगत सिंह कोश्यारी यांनी उपस्थित राहून पोलिसांना व त्यांच्या कुटुंबियांना शुभेच्छा दिल्या.

पोलीस जीमखाना, मरिन ड्राईव्ह येथे आयोजित स्वरतरंग कार्यक्रमास मुंबई पोलीस आयुक्त संजय बर्वे, सह पोलीस आयुक्त नवल बजाज, विनयकुमार चौबे, उपायुक्त एन. अंबिका आदी उपस्थित होते. आयुक्त श्री.बर्वे यांनी राज्यपाल श्री.कोश्यारी यांचे स्वागत केले.

या स्वरतंरग कार्यक्रमात ‘चला हवा येऊ द्या’ या कार्यक्रमाच्या कलाकारांनी सादरीकरण केले. तसेच विविध गाण्यांवर मराठी चित्रपट सृष्टीतील कलाकारांनी नृत्य व गीते सादर केली. या कार्यक्रमास अनेक मराठी कलाकारांनी उपस्थिती लावली होती. अभिनेता अभिजित खांडकेकर व मृण्मयी देशपांडे यांनी सूत्रसंचालन केले.

गिरगाव चौपाटी समुद्र किनारा स्वच्छता अभियानाचा समारोप

मुंबई, दि. १७ : स्वच्छता हा शिकविण्याचा किंवासमजवण्याचा विषय नसून तो एक संस्कार आहे, तो सर्वांनीअंगिकारावा. यासाठीआठवड्याचे किमान दोन तास द्यावे, असेआवाहन वन विभागाचे प्रधान सचिव विकास खारगे यांनी आज येथे केले.गिरगाव चौपाटी किनारा स्वच्छता अभियानाचा समारोप आज करण्यात आला. त्यावेळी ते बोलत होते. कार्यक्रमास प्रधान मुख्य वन संरक्षक दिनेशकुमार त्यागी, अपर प्रधान मुख्य वन संरक्षक एन.वासुदेवन, विरेंद्र तिवारी, ठाणे मुख्य वनसंरक्षक नरेश झुरमुरे तसेचसामाजिक वनीकरण शाखेतील इतर अधिकारी उपस्थित होते.

पर्यावरण, वन व जलवायु मंत्रालय यांच्या विद्यमाने विभागीय अधिकारी, सामाजिक वनीकरण शाखा, ठाणे यांच्यामार्फत  दि. ११ ते १७ नोव्हेंबर २०१९ या कालावधीत गिरगाव चौपाटी समुद्र किनारा स्वच्छता मोहीम आयोजित करण्यात आली होती. त्याचा समारोप आज वन विभागाचे प्रधान सचिव विकास खारगे यांनी केला.

यावेळी श्री.खारगे म्हणाले, स्वच्छतेचे हे अभियान मर्यादित न राहता ती चळवळ झाली पाहिजे. समुद्र किनाऱ्याची स्वच्छता ही जबाबदारी केवळ शासनाची नसून यात सर्वांनी सहभागी होणे आवश्यक आहे. या अभियानात २हजार स्वयंसेवकांनी सहभाग नोंदविला असून गिरगाव चौपाटीचा ६.४५ कि.मी. समुद्र किनारा स्वच्छ झाला आहे.  

जैव विविधता टिकवून ठेवणे ही काळाची गरज असून कांदळवन संवर्धनामुळे त्सुनामी, सायक्लॉन सारख्या आपत्तीपासून संरक्षण होते. या अभियानात सहभागी झालेल्या सामाजिक, स्वयंसेवी संस्थांच्या प्रतिनिधींबरोबर एन.एस.एस, एन.सी.सीचे विद्यार्थी, शालेय-महाविद्यालयीन विद्यार्थी, राष्ट्रीय हरित सेनेचे सदस्य, सामाजिक वनीकरण शाखा आदींचे श्री.खारगे यांनी कौतुक केले.

श्री.त्यागी म्हणाले की, या अभियानाअंतर्गत गिरगाव, उरण, गणपतीपुळे आणि तारकर्ली असे चार समुद्र किनारे स्वच्छ करण्यात आले. याअभियानाअंतर्गत २८.३५ कि.मी. समुद्र किनारा स्वच्छ करण्यात आला. या संपूर्ण अभियानात 6 हजार पेक्षा जास्त स्वयंसेवकांनी सहभाग घेतला असून सुमारे ६३ टन कचऱ्याची विल्हेवाट लावण्यात आली.

कार्यक्रमाच्या सुरुवातीस स्वच्छतेवर आधारीत‘लक्ष्मण रेषा’ हे पथनाट्य सादर करण्यात आले.  यावेळी या अभियानात सहभागी झालेल्या सर्वांना प्रशस्तीपत्र देण्यात आली.

मुंबई, दि. १६ : मुख्यमंत्री सहायता निधी कक्षासाठी अधिकारी, कर्मचारी यांच्या सेवा राष्ट्रपती राजवटीच्या कालावधीत देखील चालू ठेवण्यासाठी सावधी पदे (Tenure Posts) निर्माण करुन त्या पदांवर सध्या ३ अधिकाऱ्यांची नियुक्ती करण्यास शासन मान्यता देण्यात आली आहे.

यासंदर्भातील शासन निर्णय सामान्य प्रशासन विभागामार्फत निर्गमित करण्यात आला आहे. मुख्यमंत्री सहायता कक्षासाठी नियुक्त करण्यात आलेले ३ अधिकारी या कक्षात रुजूही झाले आहेत. लेखा व कोषागारे संचालनालयातील १ सहायक संचालक व २ सहायक लेखा अधिकारी यांची नियुक्ती सध्या करण्यात आली आहे.

प्रशिक्षणार्थी अधिकाऱ्यांना देशातील सर्व राज्यांच्या संस्कृती व परंपरांची ओळख करून देण्यासाठी उपक्रम मसुरी, दि. 16 : महाराष्ट्र राज्याच्या थोर परंपरेचे दर्शन लालबहादूर शास्त्री राष्ट्रीय प्रशासन अकादमी, मसुरी (उत्तराखंड) येथे ‘महाराष्ट्र दिन‘कार्यक्रमात झाले.

मसुरी (उत्तराखंड) येथील लालबहादूर शास्त्री राष्ट्रीय प्रशासन अकादमीमधील प्रशिक्षणार्थी अधिकाऱ्यांना देशातील सर्व राज्यांच्या संस्कृती व परंपरांची ओळख करून देण्याचा उपक्रम राबविण्यात येतो. या उपक्रमातील एक भाग म्हणून15 नोव्हेंबर 2019 रोजी ‘महाराष्ट्र दिन’कार्यक्रमाचे आयोजन करण्यात आले होते. या कार्यक्रमासाठी संपूर्ण लालबहादूर शास्त्री राष्ट्रीय प्रशासन अकादमी झेंडूच्या फुलांनी सजविण्यात आली होती. अकादमीतील प्रशिक्षणार्थी अधिकाऱ्यांनी गणेश पूजनाने कार्यक्रमाची सुरूवात केली. यात मराठी अधिकाऱ्यांसोबत अमराठी अधिकाऱ्यांनीही सहभाग घेतला.

या कार्यक्रमानिमित्त दिवसभर महाराष्ट्रीय वातावरण जोपासण्यात आले. सकाळच्या नाश्त्यापासून रात्रीच्या जेवणात महाराष्ट्रीयन खाद्यपदार्थांचा समावेश करण्यात आला. सायंकाळच्या प्रशिक्षण सत्रादरम्यान वडापाव-मिर्चीचा नाश्ता तर रात्रीच्या जेवणात कोल्हापुरी जेवणाचा समावेश होता.

सायंकाळी अकादमीतील मराठी व अमराठी अधिकाऱ्यांनी सांस्कृतिक कार्यक्रमाचे आयोजन करून सहभाग घेतला. यावेळी अकादमीतील सर्व मराठी व अमराठी अधिकारी महाराष्ट्रीयन वेशभूषेत सहभागी झाले होते. पुरूष अधिकाऱ्यांनी फेटे बांधले होते तर महिला अधिकाऱ्यांनी नऊवारी साडी व नथ परिधान केली होती. तसेच मुंबई येथील पृथ्वी इनोव्हेशन्स ग्रुपच्या कलाकारांनी सांस्कृतिक कार्यक्रम सादर केला. या सांस्कृतिक कार्यक्रमाचे आयोजन अकादमीतीली संपूर्णानंद ऑडिटोरियममध्ये करण्यात आले होते.

लालबहादूर शास्त्री राष्ट्रीय प्रशासन अकादमीच्या या’महाराष्ट्र दिन’कार्यक्रमात महाराष्ट्र पर्यटन विकास महामंडळ व महाराष्ट्र लघु उद्योग विकास महामंडळ सहभागी झाले होते. अकादमीच्या कर्मशीला हॉलमध्ये महाराष्ट्र पर्यटन विकास महामंडळ व महाराष्ट्र लघु उद्योग विकास महामंडळाने संपूर्ण दिवस प्रदर्शनी लावली होती. या प्रदर्शनीत महाराष्ट्र लघु उद्योग विकास महामंडळातर्फे पैठणी साडी/पर्सच्या स्टॉलसोबत कोल्हापुरातील हुपरी ज्वेलरीचे स्टॉल लावण्यात आले होते. तसेच काही साड्यांवर 50 टक्के सूटही देण्यात आली होती.

यावेळी महाराष्ट्र परिचय केंद्राच्या  जनसंपर्क अधिकारी अमरज्योत कौर अरोरा व महाराष्ट्र सदनच्या व्यवस्थापक भगवंती मेश्राम यांना’महाराष्ट्र  दिन’ कार्यक्रमाच्या यशस्वी आयोजनासाठी लालबहादूर शास्त्री राष्ट्रीय प्रशासन अकादमीचे प्रशिक्षण समन्वयक  निरंजन  सुधांशु  यांच्या हस्ते गौरविण्यात आले.  

डॉ.उत्तम पाचारणे यांच्या पुढाकाराने प्रथमच चित्रकारांचे निवासी शिबीर

नवी दिल्ली, 16 : महाराष्ट्राचे सुपुत्र तथा राष्ट्रीय ललित कला अकादमीचे अध्यक्ष डॉ. उत्तम पाचारणे यांच्या पुढाकाराने राष्ट्रपती भवनात प्रथमच देशातील ज्येष्ठ व नामवंत आणि तरूण चित्रकारांचे निवासी शिबीर आयोजित करण्यात आले आहे. या चित्रकारांच्या कलाकृती कायमस्वरूपी राष्ट्रपतीभवनात लावण्यात येणार आहेत. असा उपक्रम राबविण्याचा मान डॉ. पाचारणेंना मिळाला असून त्यांच्या रूपाने मराठीची चित्रमुद्राच राष्ट्रपतीभवनात उमटली आहे. 

राष्ट्रीय ललित कला अकादमीच्या अध्यक्षपदाचा पदभार स्वीकारल्यानंतर डॉ. पाचारणे यांनी अकादमीच्या माध्यमातून नाविन्यपूर्ण उपक्रम राबविले आहेत. राष्ट्रपती भवनात बहुतांश परदेशी चित्रकारांचीच चित्रे असल्याचे निदर्शनास आल्यावर या भव्य वास्तूत देशातील नामवंत चित्रकारांच्या चित्रांचाही समावेश व्हावा या चिंतनातून डॉ. पाचारणे यांनी अकादमीच्या वतीने नाविन्यपूर्ण उपक्रम राबविण्याचा मानस केला. त्याचीच फलश्रुती म्हणजे देशातील ज्येष्ठ व नामवंत चित्रकार आणि तरूण चित्रकारांच्या निवासी शिबिराचे या वास्तुतील आयोजन होय.

10 ते 17 नोव्हेंबर 2019 या कालावधीत आयोजित या शिबिरामध्ये देशातील ज्येष्ठ व नामवंत 12 चित्रकार आणि 3 तरूण चित्रकारांचा समावेश आहे. प्रत्येक कलाकार हा आपल्या वैशिष्ट्यपूर्ण शैलीसाठी प्रसिद्ध असून त्यांच्या दीर्घ साधनेतून राष्ट्रपती भवनाच्या वास्तूत श्रेष्ठ कलाकृती आकाराला येत आहेत. प्रत्येक चित्रकार या शिबिरादरम्यान आपल्या दोन कलाकृती तयार करीत आहे.

महाराष्ट्रातील तीन चित्रकारांचा समावेश

राष्ट्रीय ललित कला अकादमीच्या माध्यमातून प्रथमच चित्रकारांचे निवासी शिबीर राष्ट्रपती भवनात आयोजित करण्यात आले आहे. हा एक ऐतिहासिक प्रसंग असून महाराष्ट्रातील एक ज्येष्ठ आणि दोन तरुण असे तीन चित्रकार या शिबिरात सहभागी झाले आहेत. राष्ट्रपती भवनातील निसर्गरम्य वातावरणात चित्र काढण्याचा वेगळाच आनंद असल्याचे मुबंई येथील ज्येष्ठ व नामवंत  चित्रकार सुहास बहुलकर यांनी सांगितले. चित्रकारांच्या पहिल्यावहिल्या निवासी शिबिरात सहभागी होणे हा बहुमान असल्याचेही ते म्हणाले. श्री. बहुलकर यांनी भिंतीवरील चित्रशैली आणि त्यात पोतांचा लीलया वापर करून या ठिकाणी दोन कलाकृती साकारल्या आहेत. त्यात महाराष्ट्राची संस्कृती, परंपरा , वाडे , पूर्वज आणि त्याच्यावर उमटलेल्या नियतीच्या पाऊलखुणा या सगळयांची वर्तमानासोबत सांगड घातली आहे.

तुळजापूर येथील सिद्धार्थ शिंगाडे आणि अहमदनगर येथील प्रणिता बोरा हे तरूण चित्रकारही या ऐतिहासिक शिबिरात सहभागी झाले आहेत. सिद्धार्थ शिंगाडे यांनी साकारलेल्या पहिल्या कलाकृतीत भगवान शंकर आणि त्यांचे वाहन आराम करीत असल्याचे दर्शविले असून यात निळया रंगाची उत्तम छटा दाखवत  निसर्गरम्य पहाटेचे सौंदर्यही खुलविले आहे. श्री. शिंगाडे यांच्या दुसऱ्या कलाकृतीत त्यांनी ग्रामीण महाराष्ट्राचे चित्र रेखाटले आहे ज्यात खेळणी विकणारे दांपत्य, गायी चरायला नेणारा मुलगा, मंदिर, स्त्री आदी प्रतिमा साकारल्या आहेत. प्रणिता बोरा यांनी उत्तम रंगसंगतीचा उपयोग करून  राधा-कृष्ण आणि मीरा यांच्या विविध प्रतिमा कौशल्यपूर्ण पद्धतीने आपल्या कलाकृतीत मांडल्या आहेत.

राष्ट्रपती कोविंद साधणार चित्रकारांशी संवाद

राष्ट्रपती राम नाथ कोविंद हे 17 नोव्हेंबर रोजी स्वत: या निवासी शिबिराचे अवलोकन करणार असून सहभागी चित्रकारांसोबत संवाद साधणार आहेत. या शिबिरादरम्यान चित्रकारांनी चितारलेल्या कलाकृती कायमस्वरूपी राष्ट्रपती भवनात प्रदर्शित करण्यात येणार आहे. राष्ट्रपती भवनाची शोभा या कलाकृतींच्या माध्यमातून वाढणार आहे. राष्ट्रपती भवनास भेट देणारे देश-विदेशातील विशेष अतिथी तसेच सामान्य जनतेलाही या कलाकृती बघायला मिळणार आहेत.

शिबिरात सहभागी कलाकारांमध्ये अंजली इला मेनन, अन्वर खान, अर्पिता सिंग, चंद्रा भट्टाचार्यजी,  चिन्मय रॉय, गणेश हालोई, क्रिशेन खन्ना,लालुप्रसाद शॉ, परमजित सिंग, सनत कर, संजय भट्टाचार्य आणि सुहास बहुलकर या  ज्येष्ठ व नामवंत चित्रकारांसह विम्मी इंद्रा , प्रणिता बोरा आणि सिध्दार्थ शिंगाडे या तरूण चित्रकारांचा समावेश आहे.