नवी दिल्ली, दि. 14 : भारत आंतरराष्ट्रीय व्यापार मेळ्यात‘महाराष्ट्रातील व्यवसाय सुलभता’ संकल्पनेवर आधारीत महाराष्ट्र दालनाचे उद्घाटन आज महाराष्ट्र सदनाचे निवासी आयुक्त समीर सहाय यांच्या हस्ते झाले.

केंद्रीय वाणिज्य व उद्योग मंत्रालयाच्या इंडिया ट्रेड प्रमोशन ऑर्गनायजेशनच्यावतीने येथील प्रगती मैदानमध्ये ३९ व्या‘भारत आंतरराष्ट्रीय व्यापार मेळ्याचे’ आयोजन करण्यात आले आहे. महाराष्ट्र लघुउद्योग विकास महामंडळाने येथील हॉल क्रमांक ‘१२-अ’ मध्ये ‘व्यवसाय सुलभतेच्या’ माध्यमातून महाराष्ट्रातील उद्योग क्षेत्राच्या प्रगतीचे दर्शन घडविणारे सुरेख प्रदर्शन साकारले आहे. महाराष्ट्र सदनाचे निवासी आयुक्त समीर सहाय यांच्या हस्ते या प्रदर्शनाचे उद्घाटन झाले. यावेळी महाराष्ट्र लघुउद्योग विकास महामंडळाचे व्यवस्थापकीय संचालक बी.वेणुगोपाल रेड्डी, महाराष्ट्र सदनाच्या सहायक निवासी आयुक्त सुमन चंद्रा आणि महाराष्ट्र लघुउद्योग विकास महामंडळाचे महाव्यवस्थापक विजय कपाटे उपस्थित होते.

महाराष्ट्र दालनामध्ये एकूण १० स्टॉल्स उभारण्यात आले असून‘महाराष्ट्र उद्योग, व्यापार आणि गूंतवणूक सुविधा कक्ष’, महाराष्ट्र उद्योग विकास महामंडळ, महाराष्ट्र प्रदूषण नियंत्रण मंडळ आणि बृहन्मुंबई महानगर पालिका यांच्यावतीने राज्यात ‘व्यवसाय सुलभतेच्या’ माध्यमातून उद्योग क्षेत्रात झालेली प्रगती दर्शविणारे स्टॉल्स उभारण्यात आले आहेत.

महाराष्ट्र राज्य ग्रामीण जिवनोन्नती अभियान, महाराष्ट्र राज्य खादी व ग्रामोद्योग मंडळ, महाराष्ट्र लघु उद्योग विकास महामंडळ, महिला आर्थिक विकास महामंडळ आणि आदिवासी संशोधन व प्रशिक्षण संस्था यांनी हस्तकला कारागिरांनी तयार केलेल्या वस्तू तसेच बचतगटांनी तयार केलेल्या वस्तुंचे प्रदर्शन व विक्रीसाठी स्टॉल्स उभारले आहेत.

२० नोव्हेंबर रोजी साजरा होणार‘महाराष्ट्र दिन’ 

व्यापार उद्येागासह या मेळाव्यात सहभागी विविध देश आणि राज्यांच्यावतीने आपली सांस्कृतिक परंपरा दर्शविणारा सांस्कृतिक कार्यक्रम दररोज सादर केला जातो. याअंतर्गत २० नोव्हेंबर रोजी सायंकाळी ५.३० वाजता प्रगती मैदान येथील‘हंसध्वनी रंगमंच’ येथे ‘महाराष्ट्र दिन’ साजरा होणार आहे. मुंबई येथील पृथ्वी इनोव्हेशन्स ग्रुपचे कलाकार हा कार्यक्रम सादर करणार असून या माध्यमातून व्यापार मेळ्यास भेट देणाऱ्या देश-विदेशातील उद्योजक व ग्राहकांना महाराष्ट्राच्या वैविद्यपूर्ण संस्कृतिचे दर्शन होणार आहे.

संयुक्त खाते नसल्यास स्वतंत्र खाते उघडणे अनिवार्य

मुंबई, दि.14 : निवृत्तीवेतनधारकांचे मासिक निवृत्तीवेतन जमा करण्यासाठी निवृत्तीवेतनधारकांना संयुक्त बँक खाते उघडण्यास शासनाने मान्यता दिलेली आहे. या खात्याद्वारे केवळ निवृत्तीवेतनधारक हयात असेपर्यंत त्याला किंवा तिला मासिक निवृत्तीवेतनाची रक्कम प्रदान करण्यात येते.

निवृत्तीवेतनधारकांच्या निधनानंतर कुटुंब निवृत्तीवेतनधारकास स्वतंत्र निवृत्तीवेतन खाते उघडावे लागत असे. कुटुंब निवृत्तीवेतनधारकांचा हा त्रास कमी करण्याच्या उद्देशाने आता या पद्धतीत सुधारणा करण्यात आली आहे. निवृत्तीवेतनधारकाच्या निधनानंतर कुटुंब निवृत्तीवेतनधारकाला नवीन बँक खाते उघडण्याची गरज नाही. त्यांना आवश्यक त्या विहित कार्यपद्धतीचा अवलंब करून योग्य त्या कार्यवाहीनंतर त्यांच्या पूर्वीच्या संयुक्त खात्याद्वारेच कुटुंब निवृत्तीवेतन प्रदान करण्यात येईल. यासंबंधीचा शासन निर्णय वित्त विभागाने 14 नोव्हेंबर 2019 रोजी निर्गमित केला आहे.

परंतु ज्या प्रकरणात निवृत्तीवेतनधारकाने संयुक्त बँक खाते उघडलेले नसेल त्या प्रकरणी कुटुंब निवृत्तीवेतनधारकाने स्वतंत्र बँक खाते उघडणे अनिवार्य करण्यात आले आहे. हा शासन निर्णय महाराष्ट्र शासनाच्याwww.maharashtra.gov.in या संकेतस्थळावर उपलब्ध असून त्याचा संकेतांक 201911141536341105 असा आहे.

मुंबई, दि. 14 : बालदिनाचे औचित्य साधून पु. ल. कला महोत्सव 2019 मध्ये सप्रेम नमस्कार विनंती विशेष या विशेष उपक्रमाची सुरुवात होणार आहे. लोप पावत चाललेल्या पत्रलेखन संस्कृतीचे संवर्धन व वहन व्हावे हा या उपक्रमामागील उद्देश आहे. मोबाईल व इंटरनेटच्या या काळात“पत्रलेखनातून व्यक्त होणे”ही भावना जवळ जवळ लुप्त झाली आहे. लहान मुलांना तर पत्रलेखन म्हणजे फक्त परीक्षेपुरतेच माहित आहे. विविध समाजमाध्यमे व मोबाईल हेच संपर्काचे साधन आहे, अशी भावना लहान  मुलांमध्ये दृढ झालेली आहे.

मुलांमध्ये लेखन व वाचन वाढावे हा दृष्टीकोन समोर ठेवून पु. ल. कला महोत्सवामध्ये येणाऱ्या लहान मुलांना पोस्टकार्डचे वाटप करण्यात येणार आहे. पोस्टकार्ड मिळालेल्या मुलाने त्याच्या जवळच्या कोणत्याही एका व्यक्तीला पत्र लिहिणे अपेक्षित आहे. ज्या व्यक्तीला हे पत्र लिहिले जाईल त्या व्यक्तीने पुढे त्याच्या जवळच्या व्यक्तीला पत्र लिहावे असे अभिप्रेत आहे. यामुळे समाजमाध्यमाशिवाय इतरही काही चांगली संपर्काची साधने आहेत हे मुलांच्या लक्षात येईल व लोप पावत चाललेल्या पत्र संस्कृतीचे संवर्धन होईल ही अपेक्षा आहे. दि. 15 नोव्हेंबर रोजी पु. ल. अकादमीमध्ये येणाऱ्या प्रत्येकास (प्रौढ व बालके) एकेक पोस्टकार्ड/आंतरदेशीय कार्ड देवून पत्र लिहिण्यास उद्युक्त करण्याचा उपक्रम होणार आहे.  

मुंबई, दि. १४ : सर्वोच्च न्यायालय रस्ते सुरक्षा समिती यांनी रस्ते अपघात आणि त्यामध्ये होणाऱ्या मृत्युंमध्ये दरवर्षी १० टक्के घट करणेबाबत निर्देश दिलेले आहेत.

रस्ते परिवहन आणि महामार्ग मंत्रालय, नवी दिल्ली यांनी मोटार वाहन अधिनियम १९८८ मधील तरतुदीनुसार देशातील विविध रस्त्यांकरिता वाहनांच्या वर्गानुरूप महत्तम वेग मर्यादा निश्चित केली आहे.

महाराष्ट्र राज्यातील रस्त्‍ो अपघातांचा आढावा घेतला असता असे निदर्शनास आले आहे की, सुमारे ३० टक्के प्राणांतिक अपघात हे वाहनचालक यांनी भरधाव वेगाने वाहन चालविल्याने होतात. महाराष्ट्र राज्यातील विविध रस्त्यांची भौगोलिक परिस्थिती, भूप्रदेश, घाटरस्ते, वळण रस्ते, समतल रस्ते आणि रस्त्याचा चढ-उतार या बाबींचा सांगोपांग विचार करून प्राणांतिक अपघातांचे प्रमाण कमी करण्यासाठी तसेच सार्वजनिक सुरक्षेसाठी वाहनांच्या वर्गानुसार महत्तम वेग मर्यादा निश्चित करणे आवश्यक आहे.

ज्या वळण रस्त्याची त्रिज्या ५० मीटरपेक्षा कमी आहे अशा सर्व रस्त्यांवर वाहनांचा वेग ताशी ३० कि.मी. निश्चित करण्यात येत आहे. सर्व रस्त्यांवरील बोगद्यामध्ये वेग मर्यादा ताशी ८० कि.मी निश्चित करण्यात येत आहे. नियम ११८, केंद्रीय मोटर वाहन नियम १९८९ मध्ये नमूद केल्यानुसार परिवहन संवर्गातील वाहनांना वेग नियंत्रकाच्या अटी लागू राहतील. यासंदर्भातील अधिक माहिती https://highwaypolice.maharashtra.gov.in या संकेतस्थळावरही उपलब्ध आहे. ही अधिसूचना दिनांक १८ नोव्हेंबर २०१९ पासून पुढील आदेशापर्यंत लागू राहील. असे अपर पोलीस महासंचालक(वाहतूक), मुंबई यांनी कळविले आहे.

मुंबई, दि. 14 : माहिती व जनसंपर्क महासंचालनालय निर्मित ‘जय महाराष्ट्र’ कार्यक्रमात ‘बहुआयामी पु.ल.देशपांडे’ या विषयावर पत्रकार व लेखक चंद्रशेखर कुलकर्णी व पुलंचे साहित्य (वेबसाईट) संकेतस्थळाच्या माध्यमातून उपलब्ध करून देणाऱ्या वेब ‍डेव्हलपर स्मिता मनोहर यांची मुलाखत घेण्यात आली आहे. ही मुलाखत दूरदर्शनच्या सह्याद्री वाहिनीवर शुक्रवार दिनांक 15 नोव्हेंबर 2019 रोजी संध्याकाळी 7.30 वाजता प्रसारित होईल.

तसेच ही मुलाखत ‘दिलखुलास’ कार्यक्रमात राज्यातील आकाशवाणीच्या सर्व केंद्रांवरून तसेच प्रसारभारतीच्या ‘न्यूज ऑन एअर’ या ॲपवरही सोमवार दि.18, मंगळवार दि. 19 नोव्हेंबर 2019 रोजी सकाळी 7.25 ते 7.40 या वेळेत प्रसारित होईल. निवेदिका मृण्मयी भजक यांनी ही मुलाखत घेतली आहे.बहुआयामी पु.ल.देशपांडे,गीतकार,संगीतकार,लेखक,नाटककार आणि कलाकार अशा सर्वप्रकारे पु.ल.देशपांडे यांचे कलेशी असलेले नाते, मला भावलेले पु.ल.देशपांडे, puldeshpande.net ही पुलंना समर्पित पहिली मराठी भाषेमधील वेबसाईट, या वेबसाईटचे स्वरूप, पु.लं चे सर्व साहित्य आपण डिजिटल स्वरूपात आणताना करावे लागलेले प्रयत्न या वेबसाईटला मिळालेला प्रतिसाद याविषयी सविस्तर माहिती श्री. कुलकर्णी व श्रीमती मनोहर यांनी ‘जय महाराष्ट्र’ व ‘दिलखुलास’ कार्यक्रमात दिली आहे.

मुंबई, दि. 14 : दि. 8 नोव्हेंबरपासून सुरु झालेल्या ‘पु. ल. कला महोत्सव 2019’ चा समारोप उद्या दि. 15नोव्हेंबर रोजी सायंकाळी 7.30 वाजता रवींद्र नाट्यमंदिर येथे होणार आहे, अशी माहिती पु.ल. देशपांडे महाराष्ट्र कला अकादमीचे प्रकल्प संचालक बिभीषण चवरे यांनी दिली.

सांस्कृतिक कार्य विभागाचे प्रधान सचिव भूषण गगराणी यांच्या प्रमुख उपस्थितीत संपन्न होत असणाऱ्या या कार्यक्रमामध्ये सुप्रसिद्ध अभिनेते भरत जाधव व सिद्धार्थ जाधव प्रमुख पाहुणे आहेत. पु. ल. कला महोत्सव2019 अंतर्गत विविध कला आविष्कारांवर आधारित दर्जेदार कार्यक्रमांचे सादरीकरण करण्यात आले. पु. ल. देशपांडे यांच्या दुर्मिळ छायाचित्रांच्या प्रदर्शनाला अनेक रसिकांनी भेटी दिल्या. अभंग रिपोस्ट या पारंपरिक शास्त्रीय–रॉक संगीत पद्धतीवर झालेल्या कार्यक्रमाने महोत्सवाचे उद्घाटन झाले होते तर समारोप हिमालयाची सावली या नाटकाने होणार आहे. या महोत्सवामध्ये कुसुम मनोहर लेले हे नाटक, इला भाटेंची ‘पै पैशाची गोष्ट’, सलील कुलकर्णी यांचा ‘बाकीबाब आणि मी’, संदीप खरे, शेखर जोशी, सावनी शेंडेचा ‘इर्षाद’, मेघा घाडगेचा लावणीचा कार्यक्रम, रेश्मा कारखानीसांची कविता, साहित्य संघाचे ‘सर्वात्मका सर्वेश्वरा’, ग्रेस यांच्यावर बेतलेली कलाकृती ‘कवी जातो तेव्हा’, ‘काजव्यांचा गाव’, ‘गुगलीफाय’ नाटक, ‘लाली’ एकांकिका, देवानंद माळी यांचा लोककला कार्यक्रम, अकॅडमी ऑफ थिएटर आर्ट्सचे नाट्य सादरीकरण, लहान मुलांसाठीचे कार्यक्रम व कार्यशाळा या व अशा अनेक कलाकृतींना प्रेक्षकांनी अक्षरशः भरभरून प्रतिसाद दिला.

महाराष्ट्रातील लोप पावत चाललेल्या सांस्कृतिक घटकांचे संवर्धन होण्यासाठी अकादमीतर्फे निर्माण केलेल्या ‘महाकला’ या वेबसाईटचे उद्घाटनही होणार आहे. रोषणाईने उजळून निघालेल्या पु. ल. अकादमीस गेले आठ दिवस वेगळेच स्वरूप प्राप्त झालेले आहे. यापुढेही अकादमीच्या माध्यमातून अशाच दर्जेदार कार्यक्रमांचे सादरीकरण व्हावे, अशी अपेक्षा अनेक प्रेक्षकांनी व्यक्त केली आहे.

दि. 15 नोव्हेंबर रोजी रवींद्र नाट्यमंदिरामध्ये संपन्न होणाऱ्या या समारोप कार्यक्रमास जास्तीत जास्त रसिकांनी उपस्थित रहावे, असे आवाहन अकादमीतर्फे करण्यात आले आहे.

सत्तावीस महानगरपालिकांच्या महापौरपदाची सोडत जाहीर

मुंबई, दि. 13 : राज्यातील 27 महानगरपालिकांच्या महापौर पदाच्या आरक्षणाच्या सोडती आज नगरविकास विभागाच्या प्रधान सचिव मनिषा म्हैसकर-पाटणकर यांच्या अध्यक्षतेखाली काढण्यात आल्या.

बृहन्मुंबईचे महापौर विश्वनाथ महाडेश्वर यांच्यासह इतर महानगरपालिकांचे महापौर, उपमहापौर तसेच पदाधिकारी, नगरविकास विभागाचे सहसचिव पांडुरंग जाधव, अवर सचिव सचिन सहस्त्रबुद्धे, कक्ष अधिकारी श्रीमती निकीता पांडे, महानगरपालिकांचे अधिकारी यावेळी उपस्थित होते. महापौर, सहसचिव श्री.जाधव तसेच महानगरपालिकांच्या पदाधिकाऱ्यांच्या हस्ते चिठ्ठी काढून महापौरपदाचे आरक्षण जाहीर करण्यात आले. विशेषत: प्रवर्गातील महिला आरक्षणाच्या सोडती महिला पदाधिकाऱ्यांच्या हस्ते काढण्यात आल्या.

प्रारंभी आरक्षण सोडतीबाबतच्या तरतुदी सांगण्यात आल्या. आरक्षण सोडत नियम 2017 मधील तरतुदीनुसार या सोडत काढण्यात आल्या. अनुसूचित जमातीचे आरक्षण सोडत काढताना 2007 पासून अनुसूचित जमातीसाठी आरक्षित असलेल्या महानगरपालिकांना सोडतीतून वगळण्यात आले. तसेच इतर संवर्गासाठी आरक्षण सोडत काढताना सध्या त्या संवर्गाचे आरक्षण असलेल्या महापालिकांना वगळण्यात येऊन अन्य महापालिकांतून आरक्षण काढण्यात आले.

विविध प्रवर्ग आणि त्यासाठी महापौरपदे आरक्षित झालेल्या महापालिका पुढीलप्रमाणे आहेत.

· अनुसूचित जमाती (सर्वसाधारण) : वसई- विरार

· अनुसूचित जाती (सर्वसाधारण) : मीरा- भाईंदर

· अनुसूचित जाती (महिला) : अहमदनगर, परभणी.

· नागरिकांचा मागास प्रवर्ग (सर्वसाधारण) : लातूर, धुळे, अमरावती

· नागरिकांचा मागास प्रवर्ग (महिला) : नांदेड-वाघाळा, सोलापूर, कोल्हापूर, मालेगाव

· खुला (सर्वसाधारण) : बृहन्मुंबई, पुणे, नागपूर, ठाणे, नाशिक, कल्याण-डोंबिवली, सांगली, उल्हासनगर

· खुला (महिला) : नवी मुंबई, जळगाव, भिवंडी, अकोला, पनवेल, पिंपरी-चिंचवड, औरंगाबाद, चंद्रपूर. 0000

Draw declared for 27 mayors of Municipality Corporation

Eight municipality mayor seats reserved for open category

Including Bruhn Mumbai, Pune, Nagpur, Thane, and Nashik

Mumbai, date.13th: Draw for mayors of 27-municipality Corporation was declared today under the presidency of Manisha Mhaiskar- Patankar, Principal Secretary of Urban Development Department.

Mayor of Brihanmumbai Vishvnath Mahadeshwar, mayors, Deputy Mayor, office bearers of other municipalities, Assistant Secretary of Urban Development Department Pandurang Jadhav, Upper Secretary Sachin Sahastrabudhhe, Unit Officer Nikita Pande and municipality officers were present at the event.   Mayor, Assistant Secretary Shri. Jadhav and municipality officers drew the chits and declared the reserved seats of the mayor.  Female office bearers drew chits for women category reservation.

Provisions of draw reservations were explained at the beginning of the programme. The draw was declared according the Reservation Act 2017.  Municipalities reserved for ST tribe since 2007 were excluded while drawing chits for ST reservation. In addition, while drawing chits for other categories, municipalities that hold reservation for same category were excluded and chits were drawn for other municipalities.

Following are the details of various categories and municipalities for which mayor posts are reserved-

ST (General): Vasai- Virar

SC (General): Mira- Bhayander

SC (Women): Ahmednagar, Parbhani

Citizen’s Backward Category (General): Latur, Dhule, Amravati

Citizen’s Backward Category (Women): Nanded- Waghala, Solapur, Kolhapur, Malegaon

Open (General): Brihanmumbai, Pune, Nagpur, Thane, Nashik, Kalyan-Dombivali, Sangli, Ulhasnagar

Open (Women): New Mumbai, Jalgaon, Bhiwandi, Akola, Panvel, Pimpri-Chinchwad, Aurangabad, Chandrapur

उद्या होणार महाराष्ट्र दालनाचे उद्घाटन

नवी दिल्ली, 14 : भारत आंतरराष्ट्रीय व्यापार मेळ्यासाठी महाराष्ट्र दालन सज्ज झाले आहे. “व्यवसाय सुलभता”(इज ऑफ डुईंग बिजनेस) या मध्यवर्ती संकल्पनेवर आधारित या मेळ्यात महाराष्ट्राने यंदा “महाराष्ट्रातील व्यवसाय सुलभता” साकारली आहे. महाराष्ट्र सदनाचे निवासी आयुक्त समीर सहाय यांच्या हस्ते उद्या 14 नोव्हेंबरला या मेळ्यातील महाराष्ट्र दालनाचे उद्घाटन होणार आहे.

प्रगती मैदान येथे दि.14 ते 27 नोव्हेंबर 2019 या कालावधीत वाणिज्य व उद्योग मंत्रालयांतर्गत कार्यरत इंडिया ट्रेड प्रमोशन ऑर्गनायजेशनच्यावतीने 39 व्या ‘भारत आंतरराष्ट्रीय व्यापार मेळ्याचे’ आयोजन करण्यात आले आहे. महाराष्ट्र लघुउद्योग विकास महामंडळाच्यावतीने “व्यवसाय सुलभतेच्या” माध्यमातून राज्याच्या उद्योग क्षेत्रातील प्रगतीचे दर्शन घडविणारे सुरेख प्रदर्शन साकारण्यात आले आहे.

राज्य शासनाच्या विविध विभागांचे 8 आणि बचतगटांचे 2 असे एकूण 10 स्टॉल्स या ठिकाणी मांडण्यात आले आहेत.‘इज ऑफ डुईंग बिजनेस’ च्या माध्यमातून उद्योग क्षेत्रातील महाराष्ट्राची भरारी यंदा राज्याच्यावतीने प्रदर्शित करण्यात आली आहे.

महाराष्ट्र दालनाचे उद्घाटन महाराष्ट्र सदनाचे निवासी आयुक्त समीर सहाय यांच्या हस्ते आणि महाराष्ट्र लघुउद्योग विकास महामंडळाचे व्यवस्थापकीय संचालक बी.वेणुगोपाल रेड्डी यांच्या उपस्थितीत14 नोव्हेंबर 2019 रोजी दुपारी 3 वाजता प्रगती मैदान येथील ‘हॉल क्रमांक 12 –अ’ मध्ये होणार आहे.

20 नोव्हेंबर रोजी साजरा होणार‘महाराष्ट्र दिन’ 

व्यापार उद्येागासह या मेळाव्यात सहभागी विविध देश आणि राज्यांच्यावतीने आपली सांस्कृतिक परंपरा दर्शविणारा सांस्कृतिक कार्यक्रम सादर केला जातो. याअंतर्गत 20 नोव्हेंबर रोजी सायंकाळी 5.30 वाजता प्रगती मैदान येथील‘हंसध्वनी रंगमंच’ येथे ‘महाराष्ट्र दिन’ साजरा होणार आहे. मुंबई येथील पृथ्वी इनोव्हेशन्स ग्रुपचे कलाकार हा कार्यक्रम सादर करणार असून या माध्यमातून व्यापार मेळ्यास भेट देणाऱ्या देश-विदेशातील उद्योजक व ग्राहकांना महाराष्ट्राच्या वैविद्यपूर्ण संस्कृतीचे दर्शन होणार आहे.