छत्रपती संभाजीनगर, दि.९ (जिमाका): राज्य राखीव दलाचा मला अभिमान आहे. या दलाने आपला दरारा आणि शान कायम राखली आहे. राज्य राखीव दलाच्या विकासासाठी पालकमंत्री म्हणून आपण भरीव निधी उपलब्ध करुन हे दल अधिक सक्षम करण्यावर आपण भर देऊ, असे आश्वासन राज्याचे सामाजिक न्याय मंत्री तथा पालकमंत्री संजय शिरसाट यांनी आज येथे दिले.

राज्य राखीव बल गट क्रमांक १४ च्या वर्धापन दिन सोहळ्यात पालकमंत्री  शिरसाट बोलत होते. राज्य राखीव बल कार्य गट क्रमांक १४ चे महासमादेशक विक्रम साळी, पोलीस उपायुक्त शीलवंत नांदेडकर, राजेंद्र जंजाळ, सिद्धांत शिरसाट व हर्षदा शिरसाट यांच्यासह राज्य राखीव बलातील पोलीस अधिकारी कर्मचारी व त्यांचे कुटुंबीय या वर्धापन दिनाच्या कार्यक्रमास उपस्थित होते.

शहरात आणीबाणीच्या प्रसंगी कायदा व सुव्यवस्था राखण्यासाठी राज्य राखीव बलाचे अधिकारी कर्मचारी नेहमीच अभिमानास्पद काम करत आले आहेत. राखीव बलामध्ये अद्यावत साधन सामग्री उपलब्ध करण्यासाठी जिल्हा नियोजन समितीच्या निधीतून भरीव तरतूद करण्यात येईल. त्यामुळे हे दल अधिक सक्षम करण्यावर आपला भर असेल. राखीव बलाचे कोरोना काळातील यांचे योगदान हे महत्त्वपूर्ण आहे,असे मंत्री शिरसाट यांनी सांगितले.

प्रास्ताविकात महासमादेशक विक्रम साळी यांनी राज्य राखीव दलाच्या कामगिरीबाबत व राबविलेल्या विविध उपक्रमांची माहिती दिली.

राज्य राखीव पोलीस बल वर्धापन दिनानिमित्त निशान सलामी देण्यात आली. त्याचप्रमाणे शहीद स्मारकास पुष्पचक्र अर्पण करण्यात आले. विविध पुरस्काराचे वितरण देखील या कार्यक्रमात करण्यात आले. महासमादेशक विक्रम साळी वैद्यकीय अधिकारी रमेश कुटे, पोलीस निरीक्षक गणपती खलूली, प्रशांत गायकवाड आणि अनिल पवार यांना सन्मानित करण्यात आले. परेड संचलन प्रशांत गायकवाड यांनी केले. श्रद्धा कुलकर्णी आणि किरण स्वामी यांनी कार्यक्रमाचे सूत्रसंचालन केले. किशन एरमोरे यांनी उपस्थितांचे आभार मानले.

०००

कोल्हापूर, दि. ०९ (जिमाका) : यंदाचा उन्हाळा अधिक तीव्र स्वरुपाचा असेल असा अंदाज आहे. त्यामुळे नागरिकांनी पाण्याचा वापर काळजीपूर्वक करावा. नागरिकांना तसेच शेतकऱ्यांना पाणी टंचाई जाणवू नये याची दक्षता घेवून धरणातील उपलब्ध पाण्याचे योग्य ते नियोजन जलसंपदा विभागाने करावे, असे निर्देश पालकमंत्री प्रकाश आबिटकर यांनी दिले.

सार्वजनिक बांधकाम विभागाच्या सभागृहात जलसंपदा विभागाच्या आढावा बैठकीत ते बोलत होते.

जलसंपदा विभागामार्फत जिल्ह्यात विविध प्रकल्पांचे बांधकाम सुरु आहे तसेच व्यवस्थापनाच्या अनुषंगाने ही बैठक झाली. सध्या जरी पाणी टंचाई जाणवत नसली तरी नागरिकांनी उपलब्ध पाण्याचा वापर काटकसरीने करावा असे आवाहनही त्यांनी केले. यावेळी पालकमंत्र्यांनी पूरनियंत्रण काम तसेच कोल्हापूर जिल्हा व्यवस्थापन उत्तर व दक्षिणचा आढावा त्याचबरोबर दूधगंगा, वारणा, धामणी, सर्फनाला, नागणवाडी, घटप्रभा आदी ठिकाणी सुरु असलेल्या कामांचा आढावा घेतला.

यावेळी जलसंपदा विभागाचे अधिक्षक अभियंता अभिजित म्हेत्रे, कार्यकारी अभियंता रोहित बांदिवडेकर, एस.आर. पाटील, डी.डी. शिंदे, स्मिता माने आदी उपस्थित होते.

०००

कोल्हापूर, दि. ०९ (जिमाका): सध्या जिल्ह्यात विविध विभागांमार्फत विकासकामे सुरु असून ती दर्जेदार व गुणवत्तापूर्ण करावीत. कामाच्या गुणवत्तेबाबत कोणतीही तडजोड नको असे निर्देश पालकमंत्री प्रकाश आबिटकर यांनी दिले.

सार्वजनिक बांधकाम विभागाच्या सभागृहात सार्वजनिक बांधकाम विभाग, कोल्हापूर अंतर्गत शहरात व जिल्ह्यात विविध विभागांकडे सुरु असलेल्या विकासकामांचा त्यांनी आढावा घेतला.

मार्च २०२६ पर्यंत सुरु असलेल्या इमारती पुर्णत्वाकडे नेण्याच्या दृष्टीने संबंधित विभागाने कार्यरत रहावे. मात्र हे करताना गुणवत्तेकडे दुर्लक्ष करु नये. सर्व विभागांनी आपआपसात समन्य ठेवावा. जिल्ह्यातील कामांची संपूर्ण राज्याने दखल घ्यावी, असे आदर्शवत काम व्हावे अशी अपेक्षा त्यांनी बैठकीत व्यक्त केली.

यावेळी पालकमंत्री आबिटकर यांनी शहरात सुरु असलेली रस्त्यांची कामे, प्रादेशिक मनोरुग्ण रुग्णालय, सांगाव (कागल) येथील वैद्यकीय महाविद्यालय, श्री क्षेत्र आदमापूर येथील विकास आराखडा, छत्रपती प्रमिलाराजे सर्वोपचार रुग्णालय इमारत देखभाल व दुरुस्ती त्याचबरोबर शेंडा पार्क येथे उभारण्यात येणारी वैद्यकीय महाविद्यालय इमारत, वसतीगृह, शासकीय तंत्रनिकेतन महाविद्यालय, शेंडा पार्क येथे उभारण्यात येणारी नवीन मध्यवर्ती प्रशासकीय इमारत तसेच सारथीची इमारत आदींचा आढावा घेतला.

लवकरच बाळूमामाच्या यात्रेला सुरुवात होत असून भाविकांची गैरसोय होवू नये याकडे प्रशासनाने लक्ष देण्याची सूचना केली.

यावेळी सार्वजनिक बांधकाम विभागाचे अधिक्षक अभियंता तुषार बुरुड, क्रीडा उपसंचालक माणिक पाटील, बी. एल हजारे, सी. ए. आयरेकर, महेश कांजर, समाज कल्याणचे सहायक आयुक्त सचिन साळे, जिल्हा क्रीडा अधिकारी नीलिमा अडसूळ, इफ्तेकार मुल्ला, बाळुमामा देवालयाचे अध्यक्ष धैर्यशील भोसले, आदमापूरचे सरपंच विजय गुरव आदी उपस्थित होते.

०००

• सर्व यंत्रणांनी कालबद्ध व काटेकोर नियोजन करावे
• आवश्यक प्रस्तावित कामांसाठी निधी उपलब्ध करून देणार

नाशिक, दि. ०९ (जिमाका):  नाशिकला धार्मिक महात्म्य असून जिल्ह्यात २०२७ साली नाशिक व त्र्यंबकेश्वर शहरात सिंहस्थ कुंभमेळा होणार आहे. हा कुंभमेळा अधिक स्वच्छ व सुरक्षित होण्याच्या दृष्टीने प्रशासकीय यंत्रणांसह लोकसहभाग अधिक महत्त्वाचा आहे,  असे आवाहन जलसंपदा (विदर्भ, तापी व कोकण पाटबंधारे विकास महामंडळ), आपत्ती व्यवस्थापन मंत्री गिरीश महाजन यांनी दिले.

जिल्हाधिकारी कार्यालयातील मध्यवर्ती सभागृहात मंत्री महाजन यांच्या अध्यक्षतेखाली आज कुंभमेळा २०२७ संदर्भात आढावा बैठकीत मंत्री महाजन बोलत होते. यावेळी आमदार सीमा हिरे, जिल्हाधिकारी जलज शर्मा, महानगरपालिका आयुक्त मनीषा खत्री, पोलीस आयुक्त संदिप कर्णिक, नाशिक महानगर विकास प्राधिकरणाचे मुख्य कार्यकारी अधिकारी डॉ. माणिकराव गुरसळ, नाशिक महानगरपालिका अतिरिक्त आयुक्त स्मिता झगडे, प्रदीप चौधरी, जिल्हा शल्य चिकित्सक डॉ. चारूदत्त शिंदे, पोलीस उपायुक्त चंद्रकांत खांडवी, अपर पोलीस अधीक्षक आदित्य मिरखेलकर, त्र्यंबकेश्वर नगर परिषदेच्या मुख्याधिकारी डॉ. श्रेया देवचक्के, जिल्हा आपत्ती व्यवस्थापन अधिकारी श्रीकृष्ण देशपांडे यांच्यासह विविध विभागांचे अधिकारी उपस्थित होते.

मंत्री महाजन म्हणाले की, सिंहस्थ कुंभमेळा हा सुरक्षित व स्वच्छ होण्यासाठी सर्व शासकीय विभागांनी नागरिकांना या कामात सहभागी केले पाहिजे. प्रशासनाकडून राबविलेल्या उपक्रमांमध्ये नागरिक स्वयंस्फूर्तीने कसे सहभागी होतील यासाठी आवश्यक उपाययोजना कराव्यात. सिंहस्थ कुंभमेळासाठी प्रथम टप्प्यातील जी कामे होण्यास दोन वर्षे लागणार आहेत अशा कामांचे प्रस्ताव तत्काळ सादर करावेत. या कामांसाठी आवश्यक निधी उपलब्ध करून दिला जाईल. कालावधी कमी असल्यामुळे कामे जलदगतीने पूर्ण करण्यासह कामे उत्तम दर्जाची होतील याकडे संबंधित यंत्रणांनी लक्ष द्यावे. यासाठी कालबद्ध व काटेकोर नियोजन सर्व यंत्रणांनी करावे, असे निर्देश मंत्री महाजन यांनी दिले.

सिंहस्थ कुंभमेळा पर्वणी ऐन पावसाळ्यात होणार आहे. त्यामुळे देशभरातून येणाऱ्या भाविकासांठी वाहनतळ व्यवस्था ही शहराच्या नजीक असावी व चिखलामुळे वाहने फसणार नाहीत यासाठी शाश्वत उपाययोजना करण्यासह वाहनतळासाठी स्थळे निश्चित करावी. देशभरातील भाविक येथे येणार असल्याने नाशिक जिल्ह्यातील पर्यटन व धार्मिक स्थळे अधिक विकसित होण्याच्या दृष्टीने नियोजन करावे. नाशिक व त्र्यंबकेश्वर येथे प्रत्येकी 5 किंवा त्यापेक्षा अधिक हेलिपॅड तयार करणे व त्या ठिकाणी वाहन व्यवस्था उभारणीसाठी नियोजन करावे. प्रयागराजच्या तुलनेत नाशिक शहरात रामकुंड व त्र्यंबकेश्वर येथील कुशावर्त या ठिकाणी जागा मर्यादित आहे. मागील कुंभमेळाच्या तुलनेत यावेळी भाविकांची गर्दी जास्त अपेक्षित असल्यामुळे अनुचित प्रकार टाळण्यासाठी आवश्यक नियोजन करण्याच्या सूचना जलसंपदा मंत्री महाजन यांनी दिल्या. येणाऱ्या काळात सिंहस्थ कुंभमेळासाठी साप्ताहिक बैठक घेतली जाणार असून सूक्ष्म नियोजनासह सर्व यंत्रणांच्या सहभागातून कुंभमेळा अधिक सुंदर व यशस्वी करू, असेही मंत्री महाजन यांनी सांगितले.

यावेळी जिल्हाधिकारी शर्मा यांनी त्र्यंबकेश्वरे येथील तर महानगरपालिका आयुक्त खत्री यांनी नाशिक शहरासाठीचा सिंहस्थ कुंभमेळा आराखड्याचे सादरीकरण करत तातडीने सुरू करावयाच्या कामांची माहिती दिली.

रामकुंड परिसराची पाहणी

तत्पूर्वी मंत्रीमहाजन यांनी रामकुंड परिसर, रामकालपथ, नारोशंकरचे मंदिर, काळाराम मंदिर, सीता गुंफा, निळकंठेश्वर महादेव मंदिर, कपिला – गोदावरी संगम, तपोवन, नाशिक रोड रेल्वे स्थानक परिसराची पाहणी केली. यावेळी आमदार देवयानी फरांदे, आमदार सीमा हिरे, पोलीस आयुक्त संदीप कर्णिक, जिल्हाधिकारी जलज शर्मा, महानगरपालिका आयुक्त मनीषा खत्री, जलसंपदा विभागाच्या अधीक्षक अभियंता अरूंधती शर्मा, अधीक्षक अभियंता राजेश गोवर्धने, विशेष कार्य अधिकारी संदीप जाधव, स्वीय सचिव जयराज कारभारी, महानगरपालिकेचे शहर अभियंता राजेश अग्रवाल, कार्यकारी अभियंता सोनल शहाणे यांच्यासह उर्जा, महावितरण व विविध विभागांचे वरिष्ठ अधिकारी उपस्थित होते.

यावेळी महानगरपालिका आयुक्त खत्री यांनी महानगरपालिकेतर्फे सिंहस्थ कुंभमेळ्याच्या पार्श्वभूमीवर केल्या जाणाऱ्या उपाययोजनांची सविस्तर माहिती मंत्री महाजन यांना दिली.

०००

मुंबई, दि. ०९ : सांस्कृतिक कार्य विभाग, सांस्कृतिक कार्य संचालनालय महाराष्ट्र शासन यांच्या वतीने राज्यातील लोककला, लोकपरंपरा व लोकसंस्कृतीचे जतन व संवर्धन व्हावे तसेच नवीन पिढीला आपल्या संस्कृतीची व परंपरेची ओळख होण्यासाठी कोकणातील प्रसिद्ध कोळी गीत नृत्य परंपरा माहिती व्हावी या उद्देशाने सांस्कृतिक कार्य मंत्री ॲड.आशिष शेलार आणि अप्पर मुख्य सचिव विकास खारगे यांच्या मार्गदर्शनाखाली सन 2025 बोहाडा आदिवासी गीत नृत्य महोत्सवाचे आजपासून आयोजन करण्यात आले आहे. दि. 11 मार्च पर्यंत हा महोत्सव असेल. सायं. 6.30 वा. श्री. अनंतराव ठाकूर नाट्यगृह देशपांडे वाडा, पारनाका, वसई (प.). येथे हा महोत्सव होईल.

महोत्सवात 9 रोजी आई जगदंबा ग्रुप ढोल नाच, घोसाळी, हिरवा देव मोरघा ग्रुप, वनवासी, गावदेवी तारपा नृत्य, घोडीचापाडा यांचे सादरीकरण होईल.

तर सोमवार 10 मार्च 2025 रोजी आदिवासी बोहाडा नंदी नृत्य, घोसाळी, आदिवासी जगदंबा माता बोहाडा, घिवंडा व आदिवासी कंणसरी तारपा नृत्य खांड, नालीपाडा या पथकाचे सादरीकरण होणार आहे. या महोत्सवाचा समरोप मंगळवार 11 मार्च 2025 रोजी होणार असून या महोत्सवात जय आदिवासी तूर नाच, डोलारी बुद्रुक, हिरवा देव ढोलनाच, वांगणपाडा, आदिवासी तारपा नृत्य, मोडध्याचापाडा यांच्या कला सादरीकरणाने होईल.

बोहाडा हा आदिवासी गीत नृत्य महोत्सव रसिक प्रेक्षकासाठी विनामूल्य आहे. रसिक, प्रेक्षकांनी याचा आस्वाद घेण्याचे आवाहन सांस्कृतिक कार्य विभागाचे संचालक विभीषण चवरे यांनी केले आहे.

०००