मुंबई, दि. 13 : आंतरजातीय आणि आंतरधर्मीय जोडप्यांना लग्नानंतर सुरुवातीच्या काळात सुरक्षित निवारा महत्त्वाचा असतो. आंतरजातीय, आंतरधर्मीय विवाह करणाऱ्या जोडप्यांच्या सुरक्षेचा प्रश्न अनेकदा गंभीर होत असून अशा प्रकरणात बेदम मारहाण ते खुनापर्यंतच्या घटना घडतात.  ऑनर किलिंग रोखण्यासाठी राज्य शासनाने प्रत्येक जिल्ह्यात ‘सुरक्षागृह’ सुविधेचा निर्णय घेतला आहे. यांची प्रभावी अंमलबजावणी करावी, असे निर्देश विधानपरिषदेच्या उपसभापती डॉ. नीलम गोऱ्हे यांनी दिले.

आज लातूर, संभाजीनगर, कोल्हापूर येथे झालेल्या ऑनर किलिंगच्या घटनांबाबत उपसभापती डॉ. नीलम गोऱ्हे यांच्या अध्यक्षतेखाली या घटनांचा आढावा घेण्यात आला.

उपसभापती डॉ. नीलम गोऱ्हे म्हणाल्या की, “राज्यातील प्रत्येक जिल्ह्यात सुरक्षागृह (सेफ हाऊस) निर्णयाची अंमलबजावणी करावी आणि याबाबतचा सविस्तर अहवाल दि. 30 जानेवारी 2025 पर्यंत  सादर करावा. ऑनर किलिंग च्या घटनेमधील पीडित मुलींचे समुपदेशन व्हावे तसेच मनोधैर्य योजनेतून पीडित महिलेला काही मदत म्हणून लाभ देता येईल का पहावे, त्यामुळे अशा मुलींना मदत होईल. तसेच, या पीडित महिलांना सक्षम करण्यासाठी कौशल्य विकास कार्यक्रमांतर्गत त्यांना प्रशिक्षण देऊन रोजगार निर्मितीला प्रोत्साहन देण्यासाठी आराखडा तयार करावा, अशा सूचनाही यावेळी दिल्या.

आंतरजातीय विवाह करणाऱ्या जोडप्यांची सामाजिक मानहानी, कौटुंबिक त्रास आ​णि ऑनर किलिंगपासून संरक्षण कण्यासाठी ‘अॅट्रॉसिटी’च्या धर्तीवर ‘आंतरजातीय विवाह कायद्या’ची निर्मिती  करण्यासाठी समिती गठीत केली होती या समितीचे पुनर्गठन करावे.

आपत्कालीन परिस्थितीत महिलांना त्वरित मदत मिळावी यासाठी सुरू करण्यात आलेल्या महिला सुरक्षेसाठीच्या हेल्पलाइन आणि विविध समित्यांची राज्यस्तरीय प्रचार प्रसिद्धी करावी, ज्यामुळे महिलांना सुरक्षितता आणि कायदेशीर मदत वेळेत उपलब्ध होईल आणि या महिलांना कायदेशीर संरक्षण मिळेल,” असेही डॉ. गोऱ्हे यांनी यावेळी सांगितले.

त्याचबरोबर, आंतरजातीय, आंतरधर्मीय विवाह करणाऱ्या जोडप्यांच्या काही तक्रार प्राप्त झाल्यास अप्पर पोलीस अधीक्षक दर्जाच्या आधिकाऱ्याने त्याचा तपास करून अहवाल सादर करावा. पोलीस उपअधीक्षक दर्जाच्या अधिकाऱ्याने तक्रार दाखल करून पुढील कार्यवाही करावी आणि अशा जोडप्यांच्या संरक्षणाकरिता विशेष कक्ष आरक्षित करावेत किंवा वसतीगृह द्यावे, अशा सूचनाही उपसभापती डॉ. नीलम गोऱ्हे यांनी केल्या.

यावेळी, बैठकीला सामाजिक न्याय आयुक्त ओमप्रकाश बकोरिया, महिला व बालविकास आयुक्त राहुल मोरे, संभाजीनगर विभागीय आयुक्त दिलीप गावडे, संभाजीनगर पोलीस आयुक्त प्रवीण पवार, पोलीस अधीक्षक महेंद्र पंडित कोल्हापूर, लातूर निवासी जिल्हाधिकारी संगीता टकले, सोमय मुंडे, पोलीस आयुक्त, आयुक्तालय पुणे संबंधित अधिकारी  ऑनलाइन उपस्थित होते.

0000

काशीबाई थोरात/विसंअ/

मुंबई, दि.१३ : जन्मापासून आपण समाजाकडून सर्व काही घेत असतो. त्यामुळे समाजाच्या ऋणाची उतराई होणे हे प्रत्येकाचे कर्तव्य आहे असे सांगून यशस्वी होण्यासाठी विद्यार्थ्यांनी तसेच युवकांनी स्वयंशिस्त पाळावी तसेच समाजाप्रति उत्तरदायित्वाची भावना ठेवावी असे प्रतिपादन राज्यपाल सी.पी. राधाकृष्णन यांनी विद्यार्थी व युवकांना संबोधित करताना केले.

स्वामी विवेकानंद यांच्या जयंतीनिमित्त साजरा होणाऱ्या राष्ट्रीय युवा दिनाचे औचित्य साधून मुंबईतील रामकृष्ण मठ आणि मिशनतर्फे आयोजित विवेक कार्यशाळेचा शुभारंभ राज्यपाल श्री. राधाकृष्णन यांच्या उपस्थितीत सोमवारी (दि. १३) रामकृष्ण मिशन सभागृह, खार येथे संपन्न झाला.

स्वामी विवेकानंद यांनी स्थापन केलेली रामकृष्ण मिशन ही संस्था शिस्त, भक्ती, उत्तरदायित्व व सर्वधर्मसमभावासाठी प्रसिद्ध आहे.  आपल्या सर्व उपक्रमात रामकृष्ण मिशन सर्व धर्म, जाती व पंथाच्या विद्यार्थ्यांना सहभागी  करून घेते हे सर्वधर्मसमभावाचे उत्तम उदाहरण असल्याचे राज्यपालांनी सांगितले. समाजाकडून घेतलेल्या दानाचा मिशन कसा विनियोग करते, हे पारदर्शीपणे समाजापुढे मांडत असल्याबद्दल राज्यपालांनी रामकृष्ण मिशनचे कौतुक केले.

अगोदर बिझनेस क्लास आता इकॉनॉमी क्लासने प्रवास

पूर्वी आपण गारमेंट निर्यातदार असताना बिझनेस क्लासने प्रवास करीत असायचो. त्यावेळी पैसा स्वतःचा असायचा.  परंतु राज्यपाल झाल्यानंतर आपण इकोनॉमी क्लासने प्रवास करतो कारण आपल्यासाठी खर्च होत असलेला पैसा जनसामान्यांचा आहे ही जाणीव आपण नेहमी बाळगतो असे राज्यपाल राधाकृष्णन यांनी यावेळी सांगितले.

रामकृष्ण मिशन मुंबईचे अध्यक्ष स्वामी सत्यदेवानंद यांनी स्वागतपर  भाषण केले तर मिशनच्या धर्मादाय हॉस्पिटलचे वैद्यकीय अधीक्षक डॉ. स्वामी दयाधिपानंद यांनी हॉस्पिटल तसेच युवकांसंबंधी उपक्रमाबद्दल अहवाल सादर केला. मिशनचे व्यवस्थापक स्वामी तन्नमानंद यांनी मिशनच्या बेलूर मठ येथे झालेल्या वार्षिक सभेच्या अहवालाचे वाचन केले.

रामकृष्ण मिशन मुंबईचे सहाय्यक सचिव स्वामी देवकांत्यानंद यांनी आभार प्रदर्शन केले. संयोजक शंतनू चौधरी यांनी सूत्रसंचालन केले तर विवेकानंद स्टडी सर्कलचे सदस्य डॉ हार्दिक गुप्ता  व आराधना धार यांनी मनोगत व्यक्त केले. या कार्यक्रमाला मिशनचे वरिष्ठ साधू तसेच विवेकानंद स्टडी सर्कलचे सदस्य व शालेय विद्यार्थी उपस्थित होते.

००००

Maharashtra Governor inaugurates Viveka Workshops on the occasion

 of Vivekananda Jayanti in Mumbai

Mumbai Dated 13 : Maharashtra Governor C. P. Radhakrishnan inaugurated the ‘Viveka Workshops’ organised by the Ramakrishna Math and Mission Mumbai on the occasion of Swami Vivekananda Jayanti at the Ramakrishna Mission Auditorium, Khar, Mumbai on Mon (13 Jan).

Addressing the students and youths on the occasion, the Governor stressed the importance of self discipline, accountability, selfless service, patience and hard work to succeed in life.

Swami Satyadevananda , President of Ramakrishna Mission Mumbai, Dr. Swami Dayadhipananda, Medical Superintendent, Ramakrishna Mission Charitable Hospital, Swami Tannamananda, Swami Devakantyananda, other senior Swamijis, members of the Vivekananda Study Circle and students from various schools were present.

००००

नाशिक, दि.13 जानेवारी, 2025 (जिमाका वृत्तसेवा):  नाशिक गृहनिर्माण व क्षेत्रविकास मंडळाने (म्हाडा) आपल्या कार्यक्षेत्रातील घरकुलांच्या प्रकल्पांना गती देत त्या संबंधितांना तातडीने हस्तांतरीत करण्यासाठी उपाययोजना कराव्यात, असे निर्देश गृह (ग्रामीण), शालेय शिक्षण, सहकार व खनिकर्म राज्यमंत्री डॉ. पंकज भोयर यांनी  येथे दिले.

मंत्री डॉ. भोयर यांनी आज नाशिक गृहनिर्माण व क्षेत्रविकास मंडळाचा (म्हाडा) शासकीय विश्रामगृह येथे आढावा घेतला. त्यावेळी ते बोलत होते. यावेळी म्हाडाचे सभापती रंजन ठाकरे, मुख्य कार्यकारी अधिकारी शिवकुमार आवळकंठे, कार्यकारी अभियंता विहार बोडके आदींसह म्हाडाचे वरीष्ठ अधिकारी उपस्थित होते.

मंत्री डॉ. भोयर यांनी सांगितले की, म्हाडाच्या माध्यमातून जास्तीत जास्त लोकांना घरकुल उपलब्ध करून देण्यासाठी प्रयत्न झाले पाहिजेत. त्यामुळे सर्वसामान्य नागरिकांना हक्काचे घरकुल उपलब्ध होऊन त्यांचे जीवनमान उंचावण्यास मदत होईल. तसेच ‘म्हाडा’च्या अडचणी सोडविण्यात येतील, असेही त्यांनी सांगितले. मंत्री डॉ. भोयर यांनी म्हाडाच्या विविध प्रकल्पांचा आढावा घेतला. मुख्य कार्यकारी अधिकारी श्री. आवळकंठे, कार्यकारी अभियंता श्री. बोडके यांनी म्हाडाच्या माध्यमातून नाशिक विभागात सुरू असलेल्या विविध प्रकल्पांची सविस्तर माहिती दिली.

नाशिक, दि.13 जानेवारी, 2025 (जिमाका वृत्तसेवा):  न्यूक्लिअस बजेट योजनेच्या माध्यमातून आदिवासी बांधवांना अनुदान दिले जाते. या योजनेच्या अनुदानात वाढ करण्यात येईल. आगामी काळात लाभार्थ्यांना २ लाख रुपयांपर्यंत अनुदान दिले जाईल. त्यासाठी आवश्यक निधी उपलब्ध करून देण्यात येईल, अशी माहिती आदिवासी विकास मंत्री डॉ. अशोक उईके यांनी दिली.

महाकवी कालिदास कलामंदिरात मंत्री डॉ. उईके यांच्या उपस्थितीत आदिवासी विकास विभागातील लाभार्थ्यांचा संवाद मेळावा आयोजित करण्यात आला होता. त्यावेळी ते बोलत होते. यावेळी व्यासपीठावर अन्न व औषध प्रशासन मंत्री नरहरी झिरवाळ, आमदार राजेश पाडवी, आदिवासी विकास विभागाचे अपर आयुक्त संदीप गोलाईत, उपायुक्त सुदर्शन नगरे, प्रकल्प अधिकारी अर्पित चौहान, अकुनुरी नरेश आदी उपस्थित होते. या कार्यक्रमात विविध बचतगट, भजनी मंडळ तसेच वैयक्तिक लाभार्थ्यांना धनादेशाचे वितरण मंत्री डॉ. उईके यांच्या हस्ते करण्यात आले.

महिला बचतगटांना पुरेसा निधी उपलब्ध करून त्यांना मुख्य प्रवाहात आणण्यासाठी प्रयत्न करण्याची गरज आहे. विविध योजनांचा लाभ देण्यासाठी प्रकल्प कार्यालयाने वर्षभराचे वेळापत्रक तयार करून लाभ द्यावा. महिला लाभार्थ्यांसाठी तालुकानिहाय बचत भवन उभारावे. त्यासाठी 25 लाख रुपयांचा निधी दिला जाईल, असेही मंत्री डॉ. उईके यांनी सांगितले.

कातकरी समाजासाठी स्वतंत्र पॅकेज

कातकरी समाजाला मुख्य प्रवाहात आणण्यासाठी आगामी अर्थसंकल्पात स्वतंत्र पॅकेज दिले जाईल. त्या माध्यमातून कातकरी समाजाचे आर्थिक सक्षमीकरण करण्यात येईल. तसेच त्यांना विविध योजनांच्या माध्यमातून लाभ दिले जातील, असेही मंत्री डॉ. उईके यांनी सांगितले. दरम्यान, मेळाव्याच्या परिसरात उभारण्यात आलेल्या विविध स्टॉलला भेट देत विविध वस्तूंची पाहणी केली. प्रकल्प अधिकारी श्री. चौहान यांनी प्रास्ताविक केले.

भौगोलिक परिस्थितीनुसार योजना कराव्यात : मंत्री नरहरी झिरवाळ

शासनाकडून विविध योजना तयार केल्या जातात.  या योजना भौगोलिक परिस्थितीनुसार तयार करण्याची गरज आहे. आदिवासी संशोधन व प्रशिक्षण संस्थेचे मुख्यालय पुणे येथे आहे. पुण्यात आदिवासी समाजाची लोकसंख्या कमी आहे. संशोधनासाठी या संस्थेचे उपकार्यालय नाशिक, धुळे अथवा नंदुरबार येथे सुरू करावे, अशी अपेक्षा अन्न व औषध प्रशासन मंत्री श्री. झिरवाळ यांनी व्यक्त केली.

कातकरी समाजासह इतर समाजातील लाभार्थ्यांनी स्वानुभव कथन केले. त्यात लता अहिरे यांनी अनुदानामुळे कुटुंबाचा उदरनिर्वाह करणे सोपे झाल्याचे सांगितले. यावेळी शाम गावित, नवनाथ कोळी यांनी मनोगत व्यक्त केले.