नाविन्यपूर्ण उपक्रमांमुळे औषध व्यवसाय परिषदेची वेगळी ओळख – वैद्यकीय शिक्षण मंत्री हसन मुश्रीफ 

मुंबई, दि.१३ : फार्मासिस्ट आणि सामान्य नागरिकांसाठी नवनवीन उपक्रम हाती घेऊन औषध व्यवसाय परिषद एक वेगळी ओळख निर्माण करण्यात यशस्वी झाली असल्याचे वैद्यकीय शिक्षण मंत्री हसन मुश्रीफ यांनी सांगितले.

महाराष्ट्र राज्य औषध व्यवसाय परिषदेच्या मुलुंड येथील नूतन वास्तूच्या उद्घाटनाप्रसंगी मंत्री श्री.मुश्रीफ बोलत होते. यावेळी परिषदेचे अध्यक्ष जगन्नाथ शिंदे यांच्यासह परिषदेचे पदाधिकारी व सदस्य उपस्थित होते.

मंत्री श्री. मुश्रीफ म्हणाले, परिषदेने मुलुंड येथे स्वमालकीची जागा खरेदी करुन यामध्ये अत्याधुनिक सेवा देणारे कार्यालय, जागतिक स्तराप्रमाणे विकसित औषध माहिती केंद्र  आणि फार्मासिस्टचे ज्ञान व कौशल्य याचे निरंतर प्रशिक्षण देण्यासाठी अत्याधुनिक तंत्रज्ञानाने बनविलेले सभागृह बनविले आहे. हे राज्याच्या आरोग्य क्षेत्रातील महत्त्वाचा टप्पा मानला पाहिजे. फार्मासिस्टचे ज्ञान अद्ययावत करण्यासाठी व जागतिक स्पर्धेला स्पर्धेनेच उत्तर देण्यासाठी शैक्षणिक अभ्यासक्रमाची निर्मिती करून कार्यशाळा राज्याच्या तालुका, जिल्हा पातळीवर तज्ञ मार्गदर्शकामार्फत आयोजित केल्या जातात हा अतिशय महत्त्वाचा उपक्रम आहे.कारण अपडेट असणे काळजी गरज आहे ते तुम्ही करता.यामुळे परिषद अधिक गुणवत्तापूर्ण काम करेल अशी  खात्री असल्याचे त्यांनी सांगितले.

आजअखेर महाराष्ट्र राज्यामध्ये ४७९ पदविका (Diploma) आणि ३१२ पदवी (Degree) व फार्म. डी. (Doctor of Pharmacy) ची ७ शासन मान्य फार्मसीची कॉलेज कार्यान्वित आहेत. कायद्याअंतर्गत फार्मसीचे शिक्षण घेणारे विद्यार्थी- विद्यार्थीनी फार्मसीचा व्यवसाय करणे, उत्पादन क्षेत्रामध्ये महत्वपुर्ण भुमिका बजावणे यासह सरकारी, निमसरकारी सेवा (फार्मासिस्ट, ड्रग इन्स्पेक्टर, फार्मसी इन्स्पेक्टर) करण्यासाठी नियम व अटींच्या आधीन राहून पंजीकरण (नोंदणी) करणे अनिवार्य आहे. आज अखेर ४.३ लाख फार्मासिस्टची नोंदणी परिषदेकडे झाली आहे.

परिषदेचे मागील २५ वर्षाच्या कालावधीमध्ये अनेक महत्त्वाचे कार्यक्रम आणि योजना कार्यान्वित केल्या आहेत. महाराष्ट्र राज्य औषध व्यवसाय परिषद आर्थिक दृष्ट्या स्वावलंबी बनवली आहे.

१९९८ मध्ये परिषदेने संकेतस्थळाची निर्मिती करुन कालानुरुप परिषदेचे सर्व कामकाज नोंदणी, पुर्नर्नोदणी, नूतनीकरण, इ. कामकाज ऑन लाइन पद्धतीने करण्यात येते.

फार्मासिस्ट प्रोफेशनल प्रोफाइल (पी.पी.पी. कार्ड) ची नवीन संकल्पना अंमलात आणून त्याचे स्मार्टकार्डमध्ये रूपांतर केले आहे. यास अन्न आणि औषध प्रशासनाने देखील मान्यता दिली आहे. फार्मासिस्ट, औषध क्षेत्रातील संशोधक, प्राध्यापक, डॉक्टर्स, हॉस्पिटल्स आणि नागरीकांना औषधाची माहिती, त्याचे शरीरावर होणारे अनुकूल व प्रतिकूल परिणाम, रासायनिक बदल बाबतची योग्य माहिती मिळू लागली आहे. यासाठी जगप्रसिद्ध Micromedex या डाटाबेस ची उपलब्धता केली जात असल्याची माहिती यावेळी देण्यात आली.

000000000

राजू धोत्रे/विसंअ

मुंबई, दि. 13 : खादी हे कापड नसून जीवनाकडे पाहण्याचा एक दृष्टिकोन आहे. खादी हे शाश्वत विकासाचे एक साधन आहे. प्रधानमंत्री नरेंद्र मोदी यांनी ‘मन की बात’ कार्यक्रमांत देशातील जनतेने खादी वापरण्याचे आवाहन केले आहे. त्याचबरोबर राज्यातील लघुउद्योजकांना सक्षम करण्यासाठी खादी व ग्रामोद्योग मंडळाने मागील 64 वर्ष अविरतपणे काम केले आहे, असे राज्य खादी व ग्रामोद्योग मंडळाचे सभापती रवींद्र साठे यांनी व्यक्त सांगितले.

राज्य खादी व ग्रामोद्योग मंडळाच्या 64 व्या वर्धापन दिनाचे औचित्य साधून ग्रामीण भागात यशस्वी उद्योग करणाऱ्या उद्योजकांना ग्रामोद्योग भरारी पुरस्काराचे वितरण यशवंतराव चव्हाण सभागृह येथे करण्यात आले, त्यावेळी ते बोलत होते. या कार्यक्रमाला मुख्य कार्यकारी अधिकारी आर.विमला, सह मुख्य कार्यकारी अधिकारी रेश्मा माळी, अर्थसल्लागार स्मिता खरात, उप मुख्य कार्यकारी अधिकारी बिपीन जगताप, खादी आयोगाचे संचालक योगेश भामरे, नित्यांनद पाटील, जिल्हा ग्रामोद्योग अधिकारी तसेच राज्यातील विविध भागातील यशस्वी उद्योजक उपस्थित होते.

सभापती श्री.साठे म्हणाले  की, पुरस्काराने ग्रामीण उद्योजकांना प्रेरणा मिळते. ग्रामीण रोजगार निर्मिती व्हावी यासाठी मंडळ अनेक योजना राबवित आहे. मधाचे गाव ही नावीन्यपूर्ण योजना राज्यात प्रभावीपणे राबवण्यात येत आहे. मधमाशी पालन हा शेतीला पूरक असणारा व्यवसाय लोकाभिमुख होत आहे. मंडळ 64 वर्ष ग्रामीण जनतेसोबत असून त्यांच्याकरिता रोजगार निर्माण करून लोकांना अर्थसहाय्यासोबत अनुदान देखील मंडळाकडून देण्यात येत असल्याचे त्यांनी सांगितले.

मुख्य कार्यकारी अधिकारी आर.विमला म्हणाल्या, रोजगार, पर्यावरण आणि लोकाभिमुख काम करण्यासाठी मंडळाचे योगदान मोठे आहे आजअखेर हजारो लोकांना मंडळाने हाताला काम देऊन स्वावलंबी केले आहे. ग्रामीण उद्योजक खऱ्या अर्थाने समाजहिताचे काम करीत आहेत. वर्धापनदिनाचे औचित्य साधून पुरस्कार कार्यक्रम अनेकांना प्रेरणा देणारा असल्याचे त्यांनी सांगितले.

पुरस्कारामध्ये  सिंधुदुर्ग येथील कौसर खान यांना प्रथम, पुणे येथील प्रमोद रोमन यांना द्वितीय तर गोंदिया येथील श्रीकांत येरणे यांना तृतीय पुरस्कार देण्यात आले. उत्तेजनार्थ पुरस्कार ठाणे येथील सुजाता पवार, नांदेडचे बालाजी काजलवाड अमरावतीच्या उज्वला गोपाळ चंदन यांना मान्यवरांच्या हस्ते पुरस्कार देण्यात आले.

या कार्यक्रमात बिपीन जगताप, योगेश भामरे, यांचीही भाषणे झाली. कार्यक्रमात मंडळाच्या वर्धापन दिनाचे औचित्य साधून ग्रामोद्योग अंकाचे प्रकाशन करण्यात आले.

कार्यक्रमात पुरस्कार्थींनी मनोगत व्यक्त केले. कार्यक्रमाचे सूत्रसंचालन रश्मी म्हाम्बरे यांनी तर आभार रेश्मा माळी यांनी मानले.

000

संजय ओरके/विसंअ

‘मुख्यमंत्री -माझी लाडकी बहीण’ योजनेसंदर्भात न्यायालयाने केलेले भाष्य, तो एक संवादाचा भाग

मुंबई दि.१३:– जमीन अधिग्रहणासंदर्भातील सर्वोच्च न्यायालय, नवी दिल्ली येथील सुरू असलेली सुनावणी आणि ‘मुख्यमंत्री -माझी लाडकी बहीण’ योजनेच्या अनुषंगाने विविध प्रसार माध्यमातून दिशाभूल करणारे वृत्त प्रसारित झालेले असून याबाबत वस्तुस्थिती पुढील प्रमाणे आहे.

पुण्याच्या एका जमीन अधिग्रहणा संदर्भातील प्रकरणामध्ये सर्वोच्च न्यायालयाने कोणत्याही प्रकारचे ताशेरे आदेशात ओढलेले नाहीत. हे प्रकरण उद्या सुनावणीसाठी ठेवलेले आहे. न्यायालयाने जे ‘मुख्यमंत्री -माझी लाडकी बहीण’ योजने संदर्भात भाष्य केले तो एक संवादाचा भाग होता. न्यायालयाने प्रकरणाच्या सुनावणी दरम्यान आज कोणत्याही प्रकारचे प्रतिकूल शेरे दिलेले नाहीत’, असा खुलासा राज्याच्या महसूल विभागाच्या वतीने राज्य शासनाचे सर्वोच्च न्यायालयातील विशेष समुपदेशी (Special Counsel for Maharashtra Govt) यांनी केला आहे.

जमीन अधिग्रहण प्रकरणी राज्य शासनाच्या वतीने सर्वोच्च न्यायालयात बाजू मांडण्यात येत असून सदर याचिकाकर्त्यांची मोबदला रक्कम 37,42,50,000/- रुपये देण्याची तयारी दर्शवली आहे. तरीही याचिकाकर्त्याने अधिक रकमेची मागणी केल्याने उद्यापर्यंत वेळ मागितला आहे . आणि न्यायालयाने हे प्रकरण सुनावणीसाठी उद्या ठेवलं आहे, असे विभागाने कळविले आहे.

00000

किरण वाघ/विसंअ

महाराष्ट्र राज्य कला शिक्षण मंडळ नियामक परिषदेची पहिली बैठक

मुंबई,दि.१४ कलावंतांची खरी संपत्ती ही कलेची  निर्मिती असते.  ती राज्याची, देशाची व जगाचीही असते. त्या कलेचे वैभव जोपासण्यासाठी कला क्षेत्रातील विद्यार्थ्यांच्या सर्वांगीण विकासाबरोबरच कला शिक्षणाचा दर्जा उंचाविण्यासाठी महाराष्ट्र राज्य कला शिक्षण मंडळाने प्रयत्न करावे, अशा सूचना उच्च व तंत्र शिक्षणमंत्री चंद्रकांत पाटील यांनी केल्या.

मंत्रालयात महाराष्ट्र राज्य कला शिक्षण मंडळ नियामक परिषदेची पहिली बैठक उच्च व तंत्र शिक्षणमंत्री चंद्रकांत पाटील यांच्या अध्यक्षतेखाली  झाली. यावेळी उच्च व तंत्र  शिक्षण विभागाचे प्रधान सचिव  विकासचंद्र रस्तोगी,कला संचालक राजेश मिश्रा, संबंधित अधिकारी उपस्थित होते.

याबैठकीत शासकीय उच्च कला  परीक्षा, शासकीय रेखाकला परीक्षा यांचे प्रस्तावित परीक्षा शुल्कास तसेच उच्चकला पदविका प्रमाणपत्र परीक्षेसाठी  विद्यार्थ्यांना देण्यात येणाऱ्या सेवांच्या शुल्कास मान्यता, राज्यकला शिक्षण मंडळासाठी लेखा परिक्षणासाठी लेखा परीक्षकाची नेमणूक, महाराष्ट्र राज्य कला संचालनालय पीएलएमधून तात्पुरत्या स्वरूपात निधी देण्यास मान्यता,महाराष्ट्र राज्य कला शिक्षण मंडळामार्फत आयोजित करण्यात येणाऱ्या बालचित्रकला स्पर्धा परीक्षा,शुल्क निश्चित समितीच्या कामासाठी संगणक प्रणाली  राबविणे याविषयावर सविस्तर चर्चा करण्यात आली.

0000

काशीबाई थोरात/विसंअ

मुंबई, दि. 13 :  उच्च व तंत्रशिक्षण मंत्री चंद्रकांत पाटील यांच्या अध्यक्षतेखाली दिवंगत आर.के.लक्ष्मण यांच्या व्यंगचित्र दालन संदर्भात आर.के.लक्ष्मण फाउंडेशन आणि डॉ. होमी भाभा विद्यापीठ,मुंबई यांच्यात सामंजस्य करार करण्यात आला.

उच्च व तंत्रशिक्षण मंत्री चंद्रकांत पाटील म्हणाले, डॉ. होमी भाभा स्टेट युनिव्हर्सिटी  आणि आर. के. लक्ष्मण फाउंडेशन यांच्यातील या सामंजस्य कराराच्या माध्यमातून  आर. के. लक्ष्मण यांच्या सर्जनशील तत्त्वज्ञानाचा समावेश करून कला शिक्षणाचा विकास करणे, विद्यार्थ्यांना आणि शिक्षकांना कला आणि संवाद शिक्षण सुधारण्यासाठी प्रशिक्षण आणि सर्जनशील अभिव्यक्ती, चिंतनशील विचार, आणि संवाद कौशल्ये विकसित करण्याच्या संधी प्रदान करण्यात येणार आहे.

या उद्दिष्टांच्या पूर्ततेसाठी, डॉ. होमी भाभा स्टेट युनिव्हर्सिटी  आणि आर. के. लक्ष्मण फाउंडेशन ११ वी इयत्तेपासून पुढील विद्यार्थ्यांसाठी कला शिक्षण कार्यक्रम सह-निर्मित आणि व्यवस्थापित करतील. या कार्यक्रमांमध्ये संग्रहालय दौऱ्यांचे आयोजन, कार्यशाळा, आणि ख्यातनाम कलाकारांशी संवाद अशा प्रत्यक्ष शिक्षणाच्या संधी समाविष्ट केल्या जातील. शिवाय, आर. के. लक्ष्मण फाउंडेशन डॉ. होमी भाभा स्टेट युनिव्हर्सिटीच्या विद्यार्थ्यांसाठी व्यावहारिक कौशल्ये आणि सर्जनशील विकासावर लक्ष केंद्रित करणाऱ्या इंटर्नशिप संधी उपलब्ध करून देईल.

मंत्रालयात झालेल्या सामंजस्य कराराच्यावेळी उच्च व तंत्रशिक्षण विभागाचे प्रधान सचिव विकासचंद्र रस्तोगी, डॉ.होमी भाभा राज्य विद्यापीठाचे कुलगुरू रजनीश कामत, डॉ.होमी भाभा राज्य विद्यापीठाचे कुलसचिव विलास पाध्ये,आर.के.लक्ष्मण फाउंडेशनचे संचालक उषा लक्ष्मण, डॉ.विशाल बानेवार व संबंधित अधिकारी उपस्थित होते.

यावेळी डॉ.होमी भाभा राज्य विद्यापीठाचे कुलसचिव विलास पाध्ये यांनी तर आर.के.लक्ष्मण फाउंडेशनचे संचालक उषा लक्ष्मण यांनी या करारावर स्वाक्षऱ्या केल्या.

००००

काशीबाई थोरात/विसंअ

मुंबई,दि.१३ : मुंबईतील सर जे.जे. कला महाविद्यालय, उपयोजित कला महाविद्यालय आणि वास्तुशास्त्र महाविद्यालय अशा तीनही शासकीय महाविद्यालयांचा मिळून डी-नोव्हो प्रकारांतर्गत अभिमत विद्यापीठाचा दर्जा देण्यात आला आहे.या विद्यापीठाच्या पदभरती संदर्भात  सकारात्मक निर्णय घेण्यात येईल,असे उच्च व तंत्र शिक्षणमंत्री चंद्रकांत  पाटील यांनी सांगितले.

मंत्रालयात उच्च व तंत्र शिक्षणमंत्री चंद्रकांत पाटील यांच्या अध्यक्षतेखाली बैठक झाली. यावेळी उच्च व तंत्र  शिक्षण विभागाचे प्रधान सचिव  विकासचंद्र रस्तोगी, संबंधित अधिकारी उपस्थित होते.

या विद्यापीठासाठी आवश्यक पदे भरण्यास मान्यता, अध्यापकीय पदांची पदभरती, शिक्षकेत्तर  पदभरती, वसतिगृह,याबाबत सविस्तर यावेळी चर्चा करण्यात आली.

००००

काशीबाई थोरात/विसंअ