मुंबई, दि. २७ : विधान परिषदेच्या मुंबई आणि कोकण विभागाच्या पदवीधर मतदारसंघासाठी तसेच  शिक्षक मतदारसंघांसाठी मतदार नोंदणी ३० सप्टेंबरपासून सुरू होणार आहे. या मतदार नोंदणीसाठी १ नोव्हेंबर २०२३ या अर्हता दिनांकावर आधारित पुनरीक्षण कार्यक्रम घोषित करण्यात आला असून मतदारांनी नोंदणी करावी, असे आवाहन मुंबई शहर जिल्हाधिकारी राजेंद्र क्षीरसागर यांनी आवाहन केले आहे.

या मतदार नोंदणीसाठी पुनरीक्षण कार्यक्रमाचे टप्पे पुढीलप्रमाणे आहेत. शनिवार ३० सप्टेंबर २०२३ रोजी जाहीर सूचना प्रसिध्द केली जाईल, वृत्तपत्रातील सूचनेची प्रथम पुनर्प्रसिद्धी सोमवार १६ ऑक्टोबरला, द्वितीय पुनर्प्रसिद्धी बुधवारी २५ ऑक्टोबरला केली जाईल. अर्ज क्रमांक १८ आणि १९ द्वारे ६ नोव्हेंबर २०२३ पर्यंत दावे आणि हरकती स्वीकारल्या जातील. त्यानंतर सोमवार २० नोव्हेंबरला हस्तलिखिते तयार करून प्रारुप मतदार याद्यांची छपाई केली जाईल. या प्रारुप मतदार याद्या २३ नोव्हेंबरला प्रसिद्ध होतील. त्यावर २३ नोव्हेंबर ते ९ डिसेंबर २०२३ पर्यंत दावे आणि हरकती स्वीकारले जातील. त्यानंतर २५ डिसेंबरपर्यंत दावे आणि हरकती निकाली काढून यादीची छपाई केली जाईल आणि ३० डिसेंबरला अंतिम यादी प्रसिद्ध केली जाईल.

मुंबई शहर जिल्ह्यामध्ये एकूण १० विधानसभा मतदारसंघ असून सदर मतदारसंघाच्या मध्यवर्ती कार्यालयात मतदारसंघाचे अर्ज स्वीकारले जातील.

मागील निवडणुकीत सन २०१८ ला मुंबई पदवीधर मतदारसंघासाठी एकूण १८३५३ इतकी मतदारांची अंतिम मतदार यादी तयार करण्यात आली होती.

पदवीधर मतदारसंघाच्या मतदार यादीमध्ये नाव नोंदणीसाठी ( नमुना १८) हा अर्ज असून त्यासाठी पुढील प्रमाणे अर्हता आवश्यक आहे. जी व्यक्ती भारताची नागरिक आहे आणि त्या मतदारसंघातील सर्वसाधारण रहिवासी आहे आणि तो १ नोव्हेंबर, २०२३ पूर्वी किमान ३ वर्ष भारताच्या राज्यक्षेत्रातील विद्यापीठाची एक, तर पदवीधर असेल किंवा त्याच्याशी समतुल्य असलेली अर्हता धारण करीत असेल, अशी प्रत्येक व्यक्ती मतदार यादीमध्ये नाव समाविष्ट करण्यास पात्र आहे.

मागील निवडणुकीत (सन २०१८) मुंबई शिक्षक मतदारसंघासाठी एकूण १८८९ इतकी मतदारांची अंतिम मतदार यादी तयार करण्यात आली होती.

शिक्षक मतदार संघाच्या मतदार यादीमध्ये नाव नोंदणीसाठी (नमूना १९) हा अर्ज असून त्यासाठी पुढीलप्रमाणे अर्हता आवश्यक आहे. अर्हता जी व्यक्ती भारताची नागरिक आहे. सर्व सामान्यपणे ज्या मतदारसंघाची रहिवासी आहे व जिने दिनांक १ नोव्हेंबर, २०२३ पूर्वी ६ मागील वर्षामध्ये राज्यातील एखाद्या माध्यमिक शाळेच्या दर्जापेक्षा कमी नसलेल्या कोणत्याही शैक्षणिक संस्थेमध्ये किमान तीन वर्ष अध्यापनाचे काम केले आहे. अशी व्यक्ती मतदार यादीमध्ये नाव समाविष्ट केले जाण्यास पात्र राहील. शैक्षणिक संस्थांची यादी पहिल्या अनुसूचीमध्ये नमूद केलेल्या अधिकाऱ्यांकडे उपलब्ध असेल.

शिक्षक मतदारसंघासाठी मतदार यादीत नाव दाखल करण्यासाठी केलेल्या नमुना १९ मधील अर्जासोबत संबंधित व्यक्तीने दिनांक १ नोव्हेंबर, २०२३ पूर्वी लगतच्या सहा वर्षामध्ये एखाद्या माध्यमिक शाळेच्या दर्जापेक्षा कमी नसलेल्या शैक्षणिक संस्थेमध्ये एकूण किमान तीन वर्ष अध्यापनाचे काम केले असल्याबाबत त्या शैक्षणिक संस्था प्रमुखाचे प्रमाणपत्र जोडणे आवश्यक आहे.

0000

राजू धोत्रे/विसंअ/

अमरावती, दि.27 : राष्ट्रपिता महात्मा गांधी यांच्या जयंतीनिमित्त संपूर्ण देशात १५ सप्टेंबर ते २ ऑक्टोबर या दरम्यान ‘स्वच्छता ही सेवा’उपक्रम राबविण्यात येणार आहे. या अभियांतर्गत ‘कचरामुक्त भारत’ बाबत विविध उपक्रमांतून जनजागृती करण्यात येणार आहे. विभागातील सर्व नागरिकांनी या अभियानात स्वयंस्फूर्तीने सहभाग घेत ‘कचरामुक्त भारत’चे स्वप्न साकारण्यासाठी प्रत्यक्ष कृतीतून आपल्या गावाची व परिसराची स्वच्छता करावी, असे आवाहन विभागीय आयुक्त डॉ. निधी पाण्डेय यांनी आज येथे केले. याप्रसंगी विभागीय आयुक्तांनी स्वत:च्या दालनाची व परिसराची स्वत: स्वच्छता करीत स्वच्‍छतेचे महत्त्व पटवून दिले.

स्वच्छता पंधरवडा निमित्त विभागीय आयुक्त कार्यालयात मंगळवारी (ता.26 सप्टेंबर) श्रमदान कार्यक्रमाचे आयोजन करण्यात आले होते. त्याप्रसंगी त्या बोलत होत्या. मनपा आयुक्त देविदास पवार, उपायुक्त संजय पवार, गजेंद्र बावणे, नगरपालिका प्रशासनाच्या सह आयुक्त माधुरी मडावी, सहायक आयुक्त श्यामकांत मस्के, तहसीलदार वैशाली पाथरे, संतोष काकडे यांच्यासह अधिकारी-कर्मचारी यावेळी उपस्थित होते. यावेळी उपस्थित अधिकारी-कर्मचारी यांच्याव्दारे विभागीय आयुक्त कार्यालयातील विभाग तसेच परिसराची प्रत्यक्षरित्या साफ-सफाई व स्वच्छता करण्यात आली.

 ‘स्वच्छता ही सेवा २०२३’ची थीम ‘कचरामुक्त भारत’ही आहे. यामध्ये दृश्‍यमान स्वच्छता व सफाईमित्र कल्याण यावर लक्ष केंद्रित करण्यात आले आहे.

ग्रामीण भागातील बसस्थानक, पर्यटन स्थळे, ऐतिहासिक वास्तू, वारसा स्थळे, नदी किनारे, सार्वजनिक ठिकाण येथे श्रमदानातून स्वच्छता करावयाची आहे. तसेच सार्वजनिक शौचालय, कचराकुंड्या, कचरा वाहतूक वाहन आदी सर्व स्वच्छतेच्या दृष्टिकोनातून दुरुस्ती, रंगकाम, साफसफाई करण्याचे निर्देश आहेत. त्यानुसार जनतेनी आपल्या गावात, शहरात, परिसरात स्वयंस्फुर्तीने पुढाकार घेत स्वच्छता मोहीम राबवावी. तसेच स्वच्छता पंधरवडा व स्वच्छता मोहिमेची व्यापक जनजागृती करावी, असे आवाहन विभागीय आयुक्तांनी यावेळी केले.

प्रारंभी, राष्ट्रपिता महात्मा गांधी व संत गाडगेबाबा यांच्या प्रतिमेस मान्यवरांच्या हस्ते पुष्पहार अर्पण करुन अभिवादन करण्यात आले. ‘स्वच्छता पंधरवडा’ आयोजनाच्या उद्देशाबाबत श्रीमती मडावी यांनी माहिती दिली. ‘मी स्वच्छतेसाठी दरवर्षी शंभर तास तसेच दर आठवड्याला दोन तास देईल’ अशी स्वच्छतेची शपथ श्रीमत मडावी यांनी उपस्थित अधिकारी-कर्मचाऱ्यांना यावेळी दिली. याप्रसंगी शहरातील स्वच्छता कर्मचाऱ्यांचा विभागीय आयुक्तांच्या हस्ते पुष्पगुच्छ देऊन त्यांच्या कार्याचा गौरव करण्यात आला.

अभियानांतर्गत गावांत आयोजिले जाणारे महत्त्वाचे उपक्रम

• गावांमधील कचरा साचलेल्या ठिकाणांची स्वच्छता
• कचरा संकलन आणि विलगीकरण शेड/केंद्रांचे बांधकाम
• पाणवठ्यांजवळील परिसर स्वच्छ ठेवणे आणि त्यांच्या आजूबाजूला वृक्षारोपण करणे
• कचऱ्याच्या उगमस्थानी कचरा विलगीकरण (सुका आणि ओला) याबाबत सामुदायिक जागरुकता
• जीईएमद्वारे ट्रायसायकल/ई-कार्ट (बॅटरीवर चालणारे वाहन) यासारखे कचरा संकलन वाहन खरेदी करणे
• प्लास्टिक सारखा अ-विघटनशील कचरा दारोदारी जाऊन गोळा करणे
• एकदाच वापरल्या जाणाऱ्या प्लास्टिकच्या (एसयुपी) दुष्परिणामांबद्दल ग्रामसभा आयोजित करून आणि एसयुपी वर बंदीचे ठराव पारित करून जनजागृती करणे
• प्लॅस्टिक कचरा व्यवस्थापनासाठी 4R तत्त्वांचा प्रचार करणे- नकार देणे, कमी करणे, पुन्हा वापरणे आणि पुनर्निर्मिती करणे
• ओडीएफ प्लस बाबत सरपंच संवाद आयोजित करणे
• भित्ती चित्र, नुक्कड नाटक, स्वच्छता रथ, समाज माध्यम साहित्य, ग्राम सभा अशा व्यापक कार्यक्रमांच्या माध्यमातून आयपीसी द्वारे जनजागृती करण्यासाठी व्यापक आयईसी आणि मास मिडिया मोहीम राबवणे
• घोषवाक्य लेखन / “कचरा न टाकण्याची” प्रतिज्ञा घेणे
• एसएचएस पोर्टलवर एसएचएस उपक्रमांच्या दैनंदिन प्रगतीची अद्ययावत माहिती देणे

मुंबई, दि. २७ : विधान परिषदेच्या मुंबई आणि कोकण विभागाच्या पदवीधर मतदारसंघासाठी तसेच  शिक्षक मतदारसंघांसाठी मतदार नोंदणी ३० सप्टेंबरपासून सुरू होणार आहे, या मतदार नोंदणीसाठी १ नोव्हेंबर २०२३ ही अर्हता दिनांक असेल, अशी माहिती मुंबई उपनगरचे उपजिल्हा निवडणूक अधिकारी तेजस किरण समेळ यांनी दिली.

एक नोव्हेंबर 2023 या अर्हता दिनांक वर आधारित पदवीधर व शिक्षक मतदारसंघाच्या मतदार नोंदणी संदर्भात  आज मुंबई उपनगर जिल्हाधिकारी कार्यालयात बैठक झाली. त्यावेळी श्री.समेळ बोलत होते.

या मतदार नोंदणीसाठी  पुनरीक्षण कार्यक्रमाचे टप्पे पुढीलप्रमाणे आहेत. शनिवार ३० सप्टेंबर २०२३ रोजी जाहीर सूचना प्रसिध्द केली जाईल, वृत्तपत्रातील सूचनेची प्रथम पुनर्प्रसिद्धी सोमवार १६ ऑक्टोबरला, द्वितीय पुनर्प्रसिद्धी बुधवारी २५ ऑक्टोबरला केली जाईल. अर्ज क्रमांक १८ आणि १९ द्वारे ६ नोव्हेंबर २०२३ पर्यंत दावे आणि हरकती स्वीकारल्या जातील. त्यानंतर सोमवार २० नोव्हेंबरला हस्तलिखिते तयार करून प्रारुप मतदार याद्यांची छपाई केली जाईल. या प्रारुप मतदार याद्या २३ नोव्हेंबरला प्रसिद्ध होतील. त्यावर २३ नोव्हेंबर ते ९ डिसेंबर २०२३ पर्यंत दावे आणि हरकती स्वीकारले जातील. त्यानंतर २५ डिसेंबरपर्यंत दावे आणि हरकती निकाली काढून यादीची छपाई केली जाईल आणि ३० डिसेंबरला अंतिम यादी प्रसिद्ध केली जाईल,

पदवीधर व शिक्षक मतदारसंघाच्या मतदार याद्या तयार करण्याच्या अनुषंगाने लागणाऱ्या अर्जाचे अनुक्रमे नमुना क्रमांक 18 व नमुना क्रमांक 19 नमुन्यांच्या छपाईच्या आदेश मुख्य निवडणूक अधिकारी महाराष्ट्र राज्य कार्यालय याकडून शासकीय मुद्रणालय, मुंबई येथे देण्यात आले असून त्यांच्याकडून ते प्राप्त करून घेऊन सर्व 26 विधानसभा मतदार नोंदणी अधिकारी यांना देण्यात येणार आहेत. तसेच मतदार नोंदणी अधिकारी मतदार नोंदणी अधिनियम 1960 चे कलम 31 (३) अन्वये जाहीर सूचना प्रसिद्ध करतील. भारत निवडणूक आयोगाच्या दिनांक 5 सप्टेंबर 2016 रोजीच्या सूचनेनुसार संबंधित मतदार नोंदणी अधिकारी विहित रीतीने आणि नमुन्यात परिशिष्ट ‘ए’ आणि ‘बी’ मध्ये सार्वजनिक नोटीस जारी करतील आणि प्रकरण परत्वे परिशिष्ट अ किंवा ब नमुन्यात नोटीसीची पुन्हा प्रसिद्ध करतील. पात्र मतदार, राजकीय पक्षांनी या कार्यक्रमाला सहकार्य करावे, असेही श्री.समेळ म्हणाले.

यावेळी इतर अधिकारी आणि विविध राजकीय पक्षांचे प्रतिनिधी उपस्थित होते.

000

संध्या गरवारे / विसंअ/

मुंबई, दि. २७ : अनंत चतुर्दशी निमित्त गणेश विसर्जन आणि ईद ए मिलादचा सण एकाच दिवशी म्हणजे उद्या गुरुवार(२८ ता)होणार असून गर्दी आणि मिरवणुकांचे योग्य व्यवस्थापन करणे पोलीस प्रशासनास शक्य व्हावे म्हणून शुक्रवार २९ तारखेस शासकीय सुट्टी जाहीर करण्याचा निर्णय राज्य शासनाने घेतला आहे.

ऑल इंडिया खिलाफत कमिटीच्या शिष्टमंडळाने यासंदर्भात मुख्यमंत्री एकनाथ शिंदे यांची भेट घेऊन विनंती केली होती. राज्यात शांततेचे वातावरण असावे आणि गर्दी तसेच मिरवणुकांचे नियोजन करता येणे पोलिसांना शक्य व्हावे म्हणून २९ तारखेस सुट्टी देण्याची विनंती त्यांनी केली होती. या शिष्टमंडळात खासदार राहुल शेवाळे, आमदार अबू आझमी, आमदार रईस शेख, नसीम खान, आदींचा समावेश होता. 

अनंत चतुर्दशीनिमित्त राज्याच्या विविध भागात गणेश विसर्जन मिरवणुका आणि ईद ए मिलादनिमित्त मिरवणुका काढण्यात येत असतात. दोन्ही सणांमुळे एकाच दिवशी निघणाऱ्या मिरवणुकांमुळे पोलीस यंत्रणांवर ताण येण्याची शक्यता लक्षात घेऊन २९ सप्टेंबरची सुट्टी जाहीर करण्याचा निर्णय घेण्यात आला आहे.

गणेश विसर्जन मिरवणुका शिस्तबद्धपणे, शांततेत पार पाडाव्यात

अनंत चतुर्दशीनिमित्त गणरायाला आपण मनोभावे निरोप देऊ. विसर्जन मिरवणुकीतही नेहमीप्रमाणे शिस्त पाळावी आणि शांतता, सद्भावनेच्या वातावरणात गणेश विसर्जन पार पाडावे असे आवाहनही मुख्यमंत्र्यांनी राज्यातील गणेशभक्तांना केले आहे.

गेले दहा दिवस श्री गणेशाच्या आगमनाने मांगल्याचे वातावरण निर्माण झाले. येणाऱ्या काळातही ईद तसेच नवरात्री, दसरा –दिवाळीसारखे सण आहेत. सर्वांनी एकोप्याने आणि भक्तिभावाने हे सण पार पाडावे आणि राज्याची परंपरा अधिक उज्वल करावी असेही मुख्यमंत्री आपल्या संदेशात म्हणतात.

गणेशोत्सवाच्या काळात पोलिसांनी संपूर्ण राज्यात कायदा व सुव्यवस्था व्यवस्थित राहील याची काळजी घेतली तसेच एकूणच गणेश मंडळांनी देखील नियमांचे पालन करून सर्वांचा हा आवडता उत्सव आनंदाने पार पाडला त्याबद्धल मुख्यमंत्र्यांनी समाधान व्यक्त केले.

उत्सव साजरा करतांना आपल्याला स्वच्छतेचे महत्व डोळ्याआड करता येणार नाही. स्वच्छ महाराष्ट्राची मोहीम आपण हाती घेतली आहे. १ ऑक्टोबरला आपण आपली गावे, वॉर्ड कचरामुक्त करणार आहोत. गणेश मंडळांनी देखील विसर्जन आणि त्यानंतर आपल्या आसपासचा परिसर स्वच्छ ठेवण्यास प्रशासनाला मदत करावी आणि चांगला संदेश द्यावा असेही मुख्यमंत्र्यांनी आवाहन केले आहे.

मुख्यमंत्र्यांकडून ईद-ए-मिलादच्या शुभेच्छा

‘ईद-ए-मिलादचे उत्सव पर्व सौहार्द-सलोखा घेऊन येईल. यातून परस्परांतील आदर-प्रेमभाव आणि स्नेह वाढीस लागावा,अशी मनोकामना व्यक्त करत मुख्यमंत्र्यांनी ईद-ए-मिलादच्या शुभेच्छा दिल्या आहेत.

‘प्रेषित मोहम्मद पैगंबर यांनी जगाला त्याग आणि प्रेमाचा संदेश दिला. त्यांचे जीवन हाच एक मोठा संदेश आहे. त्यातून प्रेरणा घेऊन आपण परस्पर आदर-प्रेमभाव वाढीस लावण्याचा प्रयत्न करूया,’ असेही आपल्या शुभेच्छा संदेशात म्हटले आहे.