विधानसभा अध्यक्षांची तीड्डी व दवडीपार (बेला) पूरबाधित गावांना भेट

भंडारा,दि.17 – तीड्डी या  पुरबाधीत गावाला पुराचा फटका बसून पाणी गावात येते. या ठिकाणी कन्हान, नागनदी व वैनगंगा नदीचा संगम होत असल्याने दूषित पाणी गावात येतो.  नागनदीच्या दुषित पाण्यामुळे गावात र्दुगंध पसरते तसेच अनेक जंतू व किडे या पाण्यातून गावात येतात. त्यामुळे गावकऱ्यांच्या आरोग्यास धोका निर्माण झाला आहे. स्वनिर्णयाने गावातील लोक पुर्नवसित होण्यास तयार आहेत. त्याकरीता जमीन उपलब्ध करुन दयावी. तसेच गावकऱ्यांच्या आरोग्यास धोका होणार नाही यासाठी उपाय योजना करण्याचे निर्देश  विधानसभा अध्यक्ष नाना पटोले यांनी दिले. शेतकऱ्यांच्या दु:खाचे निराकरण करण्यासाठी आपण अहोरात्र प्रयत्नशिल आहोत, अशी ग्वाही त्यांनी दिली.

गोसेखुर्द प्रकल्पबाधित तीड्डी व दवडीपार(बेला) गावांना भेट दिली. यावेळी अप्पर जिल्हाधिकारी घनश्याम भूगावकर, विदर्भ पाटबंधारे विभागाचे कार्यकारी संचालक जे.एम. शेख, सहाय्यक जिल्हाधिकारी मिनल करनवाल, उपविभागीय अधिकारी भस्मे, तहसिलदार अक्षय पोयाम, कॉग्रेसचे जिल्हाध्यक्ष मोहन पंचभाई  व गोसेखुर्द प्रकल्प विभागाचे अधिकारी तसेच तीड्डी व दवडीपारचे सरपंच  उपस्थित होते.

आरोग्यास धोकादायक वातावरण असल्याने  लोकांना गाव सोडून जावे लागले ही दुखा:ची बाब आहे. नदीच्या प्रदुषित पाण्याच्या वासामुळे उन्हाळयात नाहरिकांना अनेक समस्यांना सामोरे जावे लागते.  गोसेखुर्द  धरणामुळे शेतकरी आनंदी झाला. शेतकऱ्यांचा उद्धार होईल अशी भावना होती. शेतकरी सुखी झाला पाहिजे यासाठीच गोसेखुर्द प्रकल्पाची योजना कार्यान्वित करण्यात आली परंतु गेल्या अनेक  वर्षापासून हा प्रश्न गंभीर होत चालला आहे. यावर तात्काळ उपाय योजना करण्याचे निर्देश विधानसभा अध्यक्षांनी दिले. सर्वेक्षणाअभावी  आरोग्याचे प्रश्न निर्माण झाले आहेत, त्याकडे त्यांनी लक्ष केंद्रीत केले.

जिल्हयातील लोकांच्या दु:खाचे निराकरण झाले पाहिजे. अजूनही लोकांना घर, जमीनपट्टे तसेच उर्वरित मोबदला मिळाला नाही. तीन पिढया यात निघून गेल्या पण प्रश्न सुटले नाही. सातत्याने याबाबत पाठपूरावा चालू आहे. पूरबाधीत जमीन विकायची नाही, त्याबदल्यात पर्यायी जमीन घ्यावी अशी राज्यात  पध्दत आहे. परंतु येथील लोकांनी  जमीन विकून घरे बांधली पर्यायी त्यांना उदरनिर्वाहाचे साधनच राहीले नाही. जमीनीच्या बदल्यात जमीन घेतली असती तर पुर्नवासितांचे प्रश्न निर्माण झाले नसते, असे ते म्हणाले.

स्वेच्छा पुर्नवसनामुळे रोजगाराचा प्रश्न सुटेल.  वैनगंगा नदीचे पाणी बारमाही शुध्द राहीले पाहिजे. यावर आपला भर असून त्यामुळे या शुध्द पाणी, वन्यप्राणी, जंगल याचा संगम साधून पर्यटनाला चालना देता येईल. केरळ मध्ये राबविण्यात येणाऱ्या पर्यटन पॅर्टन राबविण्याचा विचार असल्याचे त्यांनी सांगितले. त्यामुळे पाण्याचा फायदा शेतीसह रोजगार निर्मितीसाठी होईल. सुदृढ जीवनासाठी स्वच्छ पाणी आवश्यक आहे. विकासाची वाटचाल कोराना संसर्गामुळे स्थगित झाली असली तरी  शेतकऱ्यांच्या दु:खाचे निराकरण करण्यासाठी आपण अहोरात्र प्रयत्नशिर आहोत, अशी ग्वाही त्यांनी दिली.

गावाची 75 टक्के घरे पूर बाधीत असल्यासच पूर्नवसन होते. दूषित पाणी व आरोग्याबाबत लवकरात लवकर कार्यवाही करण्यात येईल, असे विदर्भ पाटबंधारे विभागाचे कार्यकारी संचालक जे. एम. शेख यांनी सांगितले. 75 टक्के पाण्याचे शुध्दीकरण लवकरच प्रक्रियेद्वारे होणार आहे. नाग नदीचे पाणी धरणाद्वारे अडवून शुध्दीकरण प्रकल्पाद्वारे पाण्याची र्निजंतूकीकरण करण्यात येणार असल्याचे त्यांनी सांगितले.

दवडीपार(बेला) येथे वैनगंगा नदीचे  बॅक वॉटर नाल्याद्वारे गावात शिरते त्यामुळे येथील 98 घरे पुरबाधित झाली आहेत. त्यांना लवकरात लवकर पुर्नवसित करण्याचे विधान सभा अध्यक्षांनी सांगितले.यावेळी दवडीपार व तीड्डी येथील लोकांच्या समस्या व अडचणी विधानसभा अध्यक्षांनी  जाणून घेवून त्याचे निराकरण करण्याचे आश्वासन दिले.

चंद्रपूर, दि. 17 : चिमूर शहरातील उद्योग, व्यापार, क्षेत्रातील सर्व नागरिकांची तपासणी करण्याची मोहीम राबविण्यात यावी, असे आवाहन राज्याचे मदत पुनर्वसन, आपत्ती व्यवस्थापन, इतर मागास बहुजन कल्याणमंत्री विजय वडेट्टीवार यांनी काल येथे केले.

रविवारी चिमूर येथील शहीद स्मारक व हुतात्मा स्मारक येथे 16 ऑगस्ट क्रांती दिनाला अभिवादन केल्यानंतर त्यांनी चिमूर उपविभागीय कार्यालयांमध्ये कोरोना संदर्भात आढावा बैठक घेतली. या बैठकीमध्ये चिमूर शहरात कोरोना संदर्भातील सुरू असणाऱ्या उपाययोजनांचा आढावा त्यांनी घेतला.

या बैठकीला नगराध्यक्ष गोपाल झाडे, उपविभागीय अधिकारी प्रकाश संकपाळ, तहसिलदार संजय नागतिलक, मुख्याधिकारी मंगेश खवले, तालुका वैद्यकीय अधिकारी दिगंबर मेश्राम, गटविकास अधिकारी संजय पुरी, जि.प सदस्य ममता डुकरे, गजानन बुटके, पं.स. सभापती लता पिसे, चित्राताई डांगे आदिंची उपस्थिती होती.

यावेळी कोरोना परिस्थिती नियंत्रणात ठेवल्याबद्दल त्यांनी उपविभागीय परिक्षेत्रातील अधिकाऱ्यांचे अभिनंदन केले. तथापि, पुढील काळामध्ये गावात नव्याने येणाऱ्या नागरिकांची व व्यापार-उद्योग क्षेत्रात असणाऱ्या व लोकांच्या सातत्याने संपर्कात येणाऱ्या व्यवसायिकांची तपासणी करण्यात यावी. जेणेकरून शहर आणखी सुरक्षित राहील. त्यासाठी प्रयत्न करण्याचे निर्देश त्यांनी दिले. प्रत्येक गावांमध्ये सरपंच यांच्यासह एक चमू करण्यात आली असून याच्या मार्फत प्रत्येक नागरिकाची नोंद घ्यावी, कोरोना आजारास संदर्भात तपासणी करणे आवश्यक आहे. थोडे जरी आजारी वाटत असल्यास तातडीने तपासणी करून घ्यावी, असे आवाहनही त्यांनी यावेळी केले.    

यावेळी त्यांनी वैद्यकीय क्षेत्रात असणाऱ्या अडचणी संदर्भात माहिती घेतली. जिल्ह्यात व चिमूर उपविभागात देखील डॉक्टरांची कमतरता असल्याचे पुढे आले. याशिवाय या ठिकाणचे डायलिसीस सेंटर व सोनोग्राफी सेंटर या दोन्ही यंत्रणा बळकट करण्याचे त्यांनी निर्देश दिले.

रेतीघाट, संदर्भात काही तक्रारी आल्या असल्याचे निर्देशास आणून दिले. यासंदर्भातील प्रचलित कायद्यानुसार कारवाई करावी, जनावरांच्या लसीकरणाला गती द्यावी,चना खरेदीची थकीत रक्कम मिळावी, तसेच अन्नधान्य वितरण आणखी सक्षमतेने व्हावे, असे निर्देश दिले. उपस्थित काही पदाधिकाऱ्यांच्या सूचनांना देखील त्यांनी अधिकाऱ्यांना अवगत केले.

दुपारच्या सत्रात त्यांनी सिंदेवाही तहसील कार्यालयामध्ये कोरोना संदर्भात बैठक घेतली. तालुकास्तरीय अधिकारी उपस्थित होते.

मुंबई, दि. १७ : ख्यातनाम शास्त्रीय गायक व संगीतकार पद्मविभूषण पंडित जसराज यांच्या निधनाने भारतीय शास्त्रीय संगीताचे मोठे नुकसान झाले असून त्यांच्या जाण्याने शास्त्रीय संगीतातील एक पर्व संपले आहे, अशा शोकभावना महसूलमंत्री बाळासाहेब थोरात यांनी व्यक्त केल्या आहेत.

पंडितजी मेवाती घराण्याशी संबंधित होते. सुरुवातीला त्यांनी वडिलांकडून संगीताचे धडे गिरवले व त्यानंतर भावाने त्यांना प्रशिक्षण दिले. ८० वर्षांहून अधिक काळ ते संगीत क्षेत्रात कार्यरत होते. आपल्या संगीताने त्यांनी लाखो श्रोत्यांना मंत्रमुग्ध केले. भारतातच नाही तर संपूर्ण जगभरात त्यांनी शास्त्रीय संगीताची वेगळी छाप सोडली. पंडित जसराज यांचे भारत, अमेरिकेसह जगभरात अनेक शिष्य आहेत. पंडितजींना अनेक पुरस्कारांनी सन्मानित करण्यात आले आहे. शास्त्रीय संगीतातील त्यांच्या महत्त्वपूर्ण योगदानाबद्दल भारत सरकारने पद्मश्री, पद्मभूषण व पद्मविभूषण या पुरस्कारांनी सन्मानित केले आहे. त्यांच्या जाण्याने संगीत क्षेत्रात एक मोठी पोकळी निर्माण झाली आहे. त्यांना भावपूर्ण श्रद्धांजली अर्पण करुन पंडित जसराज यांच्या कुटुंबाच्या दुःखात सहभागी आहे, असे श्री.थोरात म्हणाले.